Mini歷史
要數Mini歷史，怎能不提有「Mini之父」美譽的AlecIssigonis。於1906年在土耳其出生的他，1928年在倫敦完成學業後，便在當地展開了首份跟汽車有關的工作，及後加入了MorrisMotorCompany，並負責設計當年頗受歡迎的MorrisMinor！到了1952年，Austin和Morris兩家車廠合併，AlecIssigonis加入BMC工作，兩年後着手設計Mini，並於1959年正式登場，瞬間成為全球熱賣車款。
講番Mini，上一代由1959年正式推出，至2000年停產的41年時間內，負責生產的公司包括BMC（BritishMotorCorporation）、AustinMorrisGroup及Rover等等，但外觀跟車內設備卻依舊SellClassic，賣點也是實用行先，所以有Countryman這類Wagon旅行車的出現。另外，在這41年的生產時間內，也曾推出過MiniCooperS和JohnCooperWorks這類辣版Mini，以滿足一眾愛開快車的車迷之要求。Mini又曾在1965年蒙地卡羅越野車賽中勝出呢！ 記者：鄭達基
老爺車迷 愈儲愈多
當牧哥帶我們去看他的珍藏時，小記和攝影師兩隻眼核即時放光，款式一應俱全，見過、未見過的都有，問他是否刻意找回來，他說：「其實我從來都無刻意去搵某一個款式，只係朋友知道我鍾意Mini，有些是朋友讓畀我，有些是朋友送畀我，結果愈儲愈多，淨係Mini加加埋埋有十幾部，另外仲有十幾架特別版嘅老爺車，好似福士Van我都有兩部，70年代Ducati電單車又有兩架，呢十幾架Mini都只係其中一部份。」
改裝Mini 有好多發揮
鍾意Mini的人，十個有十個都是愛它夠的骰，牧哥亦不例外，除了愛它外形夠得意之餘，另一原因是貪其改裝時可以有好大發揮，「我鍾意玩Mini，係因為搵零件容易，改裝又可以有多啲發揮，所以每一次出賽，每一架車都係我自己改裝。」
玩Mini最緊要維修同保養，一個人要照顧十幾架，仲要架架都有番咁上下年紀，少啲時間都唔得，「其實每一架返到嚟我都會再翻新，要保養得好，最緊要係搵個好嘅燒焊同噴油師傅，而且我每個禮拜都會逐架撻着佢。」當日所見，有幾架慘被擱置在車房高處，孤苦伶仃鋪晒塵，無辦法，牧哥話要等佢得閒先修理，暫時要委屈吓喎！
50萬Mini玩拉力 驚險百出
牧哥自言咩車都玩過，當年見細佬玩馬路賽，結果自己玩埋一份，而令他最難忘的，並非取得賽事冠軍，而是一次超驚險又辛苦的拉力賽，「嗰次我特登用五十幾萬，在英國KAD廠搵人砌咗架車玩北京拉力賽，嗰架車車殼只得700kg，有150匹馬力，點知架車到臨比賽之前一晚先到港，攞咗架車先發現原來架車都未set好，根本重有好多嘢都未整好，個尾牙最快都只可以去到100km/h，個避震係Racing唔係Rally，架車揸起嚟唧來唧去，咁樣玩短途賽就得，但無辦法，惟有頂硬上，結果一路行就一路整，試過行行吓第二個Stage條避震彈弓飛埋出嚟，成架車飛插入田，要幾十個人幫手抬車，跟住又再整，整完又再繼續，結果都可以完成比賽去到天安門，嗰次真係既難忘又辛苦。」
1971年超罕MiniPickUp
極罕有的MiniPickUp，全港獨有的兩架全都成為他的收藏品，他還特登投了一個1275的車牌用來襯車，車牌號碼正正同引擎容積1275cc一樣，夠晒心思！
1972年最愛Clubman
這部澳洲版Clubman是他的至愛，佢話鍾意佢手功精細，款式罕有而且速度夠快，快到可以拍得住CooperS！
1979年「隱形戰MOKE」
這架被牧哥形容為「本來好肉酸」的MOKE仔，經過他一輪大改裝，將頭冚燒焊改裝、再搵軍部朋友噴上迷彩色，搞兩搞就變成咁型仔，之前劉華都借過嚟揸。車身迷彩色在夜間紅外線下會變成隱形，正正是「隱形戰Moke」。
1982年6人MiniWagon
計埋司機在內，一共可以坐足6個人的Mini旅行車，是「迷你」中最高載客量的款式之一。全車另一特別之處，便是車窗仍然沿用最舊款的趟玻璃窗設計，下下要用手推，我都係第一次見。
1997年自製戰車
花了近三年時間，才完成裝嵌的落場戰車，全架由牧哥自己逐件嵌，纖維殼加上強勁引擎，為他贏過八次賽事。
同場加映
1964年迷你勞斯萊斯「RileyMarkII」
這架1964年「拉利」，車頭一大個電鍍鬼面罩，加埋個好Cute的車尾，儼如一架縮水勞斯萊斯，難怪當年堪稱為豪華版Mini。此車完全無經過改過，原裝錶板、煙斗波棍，全部依然完整無缺。
1968年經典「MarkII」
外表同經典款式分別不大的MarkII，唯一不同的是車廂設備比較簡單，無冷氣只得風扇，得一支棍的指揮燈、孖油缸。經改裝後，拆走風扇改裝冷氣，夏天唔使怕會熱到出汗。
