今日係煲呔做咗特首之後，第一次開放禮賓府畀市民賞杜鵑花，噚日特首辦就安排咗一個特別禮賓府參觀團，接待咗一班來自新界十幾間中學嘅學生先行參觀禮賓府，煲呔仲親自做導遊，帶班學生睇吓佢嘅新居。
啲花香唔香都知道
雖然煲呔入去住咗無耐，但佢對呢間前港督府嘅歷史真係如數家珍，八方睇新聞處放喺網上面嘅片，煲呔除咗講歷史，連佢花園邊啲花夜晚開，邊啲香唔香都知，又介紹禮賓府入面有兩間套房，一間叫港督套房、一間叫女皇套房，女皇套房以前就係畀皇室成員訪港時住，但肥彭年代，佢都招呼過好多國際巨星入住，好似奇雲高士拿咁！
不過班中學生都係對煲呔本人興趣大啲，不時問長問短，例如佢點減壓，煲呔話都係夏天游吓水，冬天玩吓行路機咁。
當佢知道學生入面有人就快考會考，就勉勵佢哋盡力而為，但要識得放開懷抱，因為未必一次就會成功，好似佢自己都係考咗兩次先入到政府。佢仲話希望班學生入面，有人將來可以做到禮賓府主人，即係做特首啦，但八方諗班學生未必好似煲呔咁熱心做特首啩！煲呔最後就每人送一盒禮賓府曲奇同飛龍禮物，成班學生不知幾開心。
不過八方好奇怪，為乜新聞處呢條片，硬係睇唔到煲呔個魚池同佢啲錦鯉？唔知佢有冇帶班學生去睇睇？
傳真︰2623-9278
電郵︰[email protected]