在《哈利波特》整個系列中，真係幾鍾意《火盃的考驗》！「三巫鬥法大賽」嘅緊湊、三個「小」主角愛情線開始萌芽、驚咗咁耐嘅黑魔王──佛地魔終於現真身；更令筆者驚訝的，是《哈》在這集變得不再是兒童讀物，故事角色真係有血有肉「死喺你面前」！平心而論《火》已經是拍得不錯，儘管好多書迷話未能跟足原著，但感覺是4集中最能拋開小說枷鎖，令所有觀眾輕易投入哈利世界的一集，電影始終要似番套電影嘛！
記者、攝影：朱崇德
火盃認定超額參賽者
霍格華茲今個學年真係充滿熱鬧氣氛，因遠道請來德姆蘭及波巴洞兩所魔法學校的師生，舉行已有100年歷史的三巫鬥法！而所謂火盃的考驗，就係每所院校的學生要經過魔法的火盃（有點似分院帽），挑選最有實力及資格的學生作三巫鬥法；不幸的事再一次降臨哈利身上，佢竟然成為火盃超額認定的第4名參賽者，學院內的好友認定佢為出風頭而參賽，變得眾叛親離；不過更糟的是，三巫鬥法可是一個隨時陪上性命的遊戲，而且背後還隱藏着一個重大陰謀！
3「小」角快高長「大」
睇《哈》的一大感歎，就是片拍得太慢，3個小朋友又實在大得太快！第一集幾個主角都仲係細路仔，今集眼見哈利六嚿腹肌，妙麗低胸晚裝，無論點睇，都唔可以再用可愛形容了！不過正好配合愛情線發展，妙麗同榮恩的追追逐逐，似是而非，感覺唔錯，好有年輕的感覺，不過哈利女神張秋，好明顯選角上是使用了「外國人眼中的東方美」作選角，不如叫佢去拍埋《花木蘭》罷啦！
今集電影的另一大高潮位，是佛地魔終於擺脫靈魂精神狀態，變身成人、一個實體同哈利當面對峙，加埋一大群的食死人，真係幾恐怖。原作者羅琳想表達悲壯及傷痛情感，未能發揮，感覺是有點可惜！
四巫鬥法 惡戰連場
考驗1惡鬥噴火角尾龍
自古傳說，龍是最聰明的生物，要喺一隻識噴出30呎烈火的的匈牙利角尾龍面前，偷取佢粒金蛋，絕對搵命博；原著小說描述哈利可騎着飛天掃把在它的腳下遊走，電影版條龍好似細咗啲喎！
考驗21小時人魚之戰
哈利在比賽前最後一刻先解開金蛋之迷，知到自己要在1小時內，在黑湖底尋找「一生的摰愛」！否則就會永遠都失去他！小說版描寫得一波三折，電影版時間所限，但已經算能拍出原著神髓。
考驗3危機四伏魔迷宮
魔迷宮是小說上最令讀者疑惑的一段，4名參賽者好好哋入到迷宮，但竟然無故發狂互相傾軋，電影版解釋比較詳細！咪以為去到終點就無事，皆因佛地魔正守候着哈利呢！
必睇Bonus
Making玩到Disc2另碟上，真係幾多嘢睇吓，一般刪剪片段、幕後花絮當然唔少得，最喜歡是同上隻DVD一樣，有一個座談式演員訪問，3個主角評論番對整套電影嘅感覺，都幾人細鬼大！另Disc2內重有遊戲玩，同三巫鬥法一樣有惡龍、黑湖同迷宮三關，都真係幾難玩吓，最User-friendly之處，是放入DVD機或電腦都可以玩！
《火》共分兩個版本，基本大家都係雙碟同內容，但禮品版會多送一套4套Postcard。
普通版$145
禮品版$150（a）
