梁家輝○三年於海底隧道醉酒駕駛及襲擊巴士司機留有案底，今年年初又因醉酒駕駛，被判監兩個月，緩刑三年，另停牌三年及罰款一萬元。訪問時家輝坦蕩蕩回應醉駕事件：「畀我最大教訓嘅係第一次，我真係飲得過量咗，我亦估唔到飲醉酒會同人爭執。第二次就係意外，當日我想快啲返屋企搵太太，好彩只係輕微意外，冇人命傷亡。我做咗個唔好嘅榜樣畀大家睇，人生兩次咁嘅經驗教訓真係夠喇，事實上亦真係好危險。」
家輝直言喜歡飲酒，他說：「飲酒嘅對象可遇不可求，我鍾意成班朋友一齊高興咁飲酒，覺得好relax。我算係追酒飲嘅，想將自己嘅情緒推得高啲去融合氣氛，若果唔知自己酒量去到邊就會危險。」
再闖北極
梁家輝是波爾錶代言人，早前在錶商贊助下往南極探險，家輝表示若時間配合，他希望十月可再出發往北極，家輝說：「上次去南極仲意外咁埋咗中國長城站，見到中國嘅科學家，大家都喜出望外。佢哋十月有個北極探訪團，我希望可以隨團。」問家輝遠赴這些地方冒險，太太江嘉年可會擔心？家輝說：「佢嫁得畀我，就係最大嘅冒險啦！」
家庭篇–信太太慧眼
梁家輝和太太江嘉年拍拖、結婚二十多年，至今仍甜蜜如軟糖，出街仍然手拖手，家輝在訪問中多次提及很愛太太，雖然有少少肉麻，但有夫如此，「婦」復何求？
讓女兒自主
梁家輝說：「囂啲講句，我從來冇婚姻危機。我做完小販冇耐入番影圈就同佢結婚，從來冇諗過會唔會影響事業喎，我都唔諗呢啲嘢嘅。太太嫁得畀我，就梗係要隨遇而安啦，佢可以對我有啲乜嘢期望？隨住時間，我愈嚟愈覺得屋企緊要，呢廿幾年嚟，家庭對我嘅support好大，冇得做咪食粥唔食飯咯，如果唔係太太精神上support我，我好易會諗埋一邊。」
家輝續說：「所謂婚姻，係要雙方維繫嘅，只要有愛，冇乜嘢唔可以推動。我就體會愛嘅力量好大，可以令太太咁support我、承受咁耐嘅忍耐，日日睇住老公同女演員一齊。佢對我嘅限制好輕微，戲嘅角色隨我揀，有人接唔接吻都有壓力，我冇呢啲嘢。但掉番轉頭，雖然係職業需要，又要睇我做到乜嘢程度，係咪會令到佢擔心，如果我拍完戲仲同女演員去食飯、約會，咁係人都冇信心啦，愛除咗包涵同接受，仲要令對方信任。」問家輝這些年來如何抵抗女人送上門的誘惑，他說：「呢啲係外界嘅感覺啫，我呃得到觀眾但呃唔到佢（太太），佢知我唔係咁嘅人，佢係慧眼看世界。」
家輝的一對孖女現已十多歲，若女兒要加入娛樂圈這個花花世界，家輝可會反對？他說：「入唔入娛樂圈係佢哋嘅選擇，我要幫手都未必幫到，就算幫到都未必係好事，自己揀嘅路自己走，我唔會阻撓或者推動，但完成某階段嘅學業係必須嘅。」
屢奪殊榮
年齡：48歲
家庭狀況：已婚，育有兩女
入行經過：參加無綫藝員訓練班，之後曾擔任服裝模特兒和雜誌編輯，八三年獲李翰祥導演賞識，邀請他拍攝電影《火燒圓明園》和《垂簾聽政》
威水史：
84年憑《垂簾聽政》奪香港電影金像獎最佳男主角
90年以《愛在他鄉的季節》奪台灣金馬獎最佳男主角
92年獲頒香港藝術家年獎的最佳演員獎，同年又以《92黑玫瑰對黑玫瑰》再奪香港電影金像影帝
今年憑《長恨歌》奪第十二屆香港電影評論學會大獎最佳男演員
官非：02年因危險駕駛被判社會服務令兼留案底
資料來源：《蘋果》資料室
