香港的A級模特兒不多，琦琦、馬詩慧、周汶錡、李嘉慧、Rosemary和陳嘉容近年開始轉型，有人結婚、生仔，有人出書做才女、出唱片或拍戲。李嘉慧選擇結婚生BB組織美滿家庭，上周三（八日）三八婦女節誕下逾七磅女嬰的她，早前接受訪問時大談胎教，她在懷孕期間最愛翻閱自己童年照片和BB傾偈，希望女兒像自己一樣靚女。 撰文：JessicaNgan
選美出身的李嘉慧（SofieRahman），生於小康之家，擁有四分之一馬來西亞血統，九五年選港姐奪得亞軍和最上鏡小姐，後經翁為德介紹踏上天橋，成為本港名模。
從選美到加入模特兒行列，前後經歷十一年，這十一個年頭，Sofie經歷不少，去年與拍拖三年的男友任偉成於美國秘密結婚並懷孕，上周三三八婦女節於港安醫院誕下重7.16磅BB女，並改名Valerie。
手腳一樣長長
昨日下午Sofie在丈夫陪同出院，她接受電話訪問時說：「今次係自然生，生嘅過程好順利，雖然好痛，但一見到BB就乜嘢都唔記得晒，睇住BB幾日已經大咗啲，覺得真係好神奇，我哋已經同BB影咗好多相。」她透露生產過程丈夫一直陪伴在側，問她BB女是否像她手長腳長？她說：「醫生都話佢頭大大，手仔腳仔都長長，個樣朋友就話兩個都似。」
至於BB女改名Valerie是跟隨丈夫英文名Vincent，也改V字，中文名則由老爺改。問Sofie打算何時復出？她說：「唔會咁快住，因為就算出咗去做嘢都會掛住BB，我又冇經驗，觸摸唔到BB幾時會喊，所以要慢慢訓練耐性，𠵱家有人陪我坐月，同埋老人家教我唔使咁快開始進補。」
而待產期間，Sofie接受訪問時表示每天都會閱讀有關育嬰的書籍，她說：「朋友一知我有BB，紛紛畀啲育嬰書我，𠵱家每日我都睇書消磨時間，好友何穎雯同歐陽妙芝都有教我有關育兒嘅知識。除咗睇書，我每日得閒會同BB傾偈，同聽MozartEffect（莫札特效應）嘅音樂胎教。仲有，我有拎住自己嘅BB相，同BB講希望佢可以似足我咁靚，因為有一個minime會好cute。」
會做開通母親
問Sofie有沒有想過女兒長大像她一樣參加選美？她說：「我都有諗過呢個問題，我會畀佢自由發展。我唔會反對佢選美，但係佢將會因為我嘅關係承受更大壓力。我會做思想開通嘅媽媽，畀個女一個幸福家庭，唔怕佢學壞，因為學壞嘅小朋友通常源自家庭問題。」
Sofie很少談及感情，就算結婚都秘密進行，她左手無名指戴上老公送的心形結婚鑽戒，不時流露新婚的喜悅，她說：「同老公一齊三年，大家好夾，從來未試過嗌交，老公又好愛錫我，所以先肯嫁畀佢。」Sofie指老公很低調，所以不肯公開與夫婿的結婚照。提到去年丈夫牽涉受賄案，Sofie表示事件已告一段落，不欲多提。
