權智（601）上星期五起棚兼大成交（9球股數），兩個字：「抵搞」。權智現價（0.64元）同NAV（0.6元）差無幾。場內祖國手機及無線通訊方案商：晨訊（2000）現價相對NAV（P/B）已經5倍嚟緊頭，中興通訊（763）及中國無線（2369）亦超過兩倍。權智既為科技界先鋒，具備3G手機技術，若然祖國開放3G市場，照理對權智ODM業務亦有好大推動力，權智現價最抵搞。
又before3G業務真係有偈傾，預期權智06年度（3月止）PE8倍，息率高近8厘，實情又係大平賣。再講，權智變則通，除「快譯通」，呢期亦開拓「電子學習」產品，好有偉易達（303）味道，偉易達P/B亦講緊4倍樓上。望權智翻半番見1蚊位，到時，預期PE12倍，P/B亦不過1.6倍，相對祖國手機股及偉易達，仲有好大上升空間。
揸住力華再搞華人
香港華人（655）上星期五貼住250日線，爆升前，要昅實，又講兩點：呢期游資炒同氣連枝氣氛好濃，除咗麗新系，上一期本欄主打百利保（617）及力華（156），估唔到前者百利保同系世城（355），亦炒到飛起。而華人阿媽力華已經起動，照脈絡走，好快到華人。第二，上邊系列股仔特點，係價殘兼資產折讓大。華人亦唔例外，現價貼近兩年半超殘位，未重秤前NAV（1.97元）折讓近48%，啱晒路數。Hold住力華，再搞華人，博股價重返1年高位1.27元，潛在回報23%。
錢雋