梁家輝跟太太江嘉年二十多年來風雨同路，唯一與他傳過緋聞的是張曼玉，甚至離譜到變為「三人行」。家輝雖不是偶像派，太太對此又很理解，但為了曼玉的名聲，家輝曾向她要求「避忌啲」，想不到感性的曼玉即時在餐廳一聲哭出來，嚇得家輝「腳都震埋」。撰文：張止寒
事業篇–誓做雙影帝
四十八歲的梁家輝憑《長恨歌》和《黑社會》獲香港電影金像獎兩項影帝提名，演技早已獲肯定，但他直言仍很看重獎項，他日前說：「你感覺上我攞咗好多獎，甚至攞到唔恨，其實我唔係攞咗好多獎，所以仲未可以鬆懈，點先會攞到唔恨呢？實恨㗎！辛苦做咗嘢出嚟都係希望認同，獎項就係鼓勵。我希望可以創造歷史，成為有兩個提名但同票數勝出嘅雙影帝，咁我就巴閉啦。如果要我揀一個一齊攞獎嘅對手，咁梗係任達華啦，我哋同一套戲一齊做影帝，大家都高興。」
盼進軍國際
梁家輝所以經常獲提名，原因是每次都希望做未做過、有新鮮感的角色，讓觀眾眼前一亮。」他九二年憑《情人》打入國際巿場，但始終未能躋身為國際級，對此他說：「我接《情人》，冇諗過乜嘢國際性大片，只係因為古仔同導演我都鍾意，亦冇諗過會喺歐洲咁轟動，之後好多荷李活劇本寄嚟，部部都好似《情人》咁，所以我冇接。我同周潤發唔同，佢喺東南亞已經集體認同係實力派，當時我覺得自己未夠。咁多年我想證明自己唔係局限於港星，我聽到『港星』呢個稱呼覺得好礙耳，明星就明星，點解要係港星？我希望畀人認同我係中國演員，𠵱家我覺得自己做到咯，亦差唔多係時候（進軍國際）啦，但都要睇機緣。」
無悔做小販
雖然公認好戲，但家輝跟周潤發、梁朝偉的成就還是有距離，這是因為他事業心不夠強、還是對金錢的追求不夠迫切？梁家輝說：「我的確唔係事業心強嘅人，如果做嘢會影響到家庭，我會選擇唔做呢行，或者你聽落會以為我對電影唔夠尊重。我承認電影畀咗我好多，但我覺得屋企比任何事都重要。錢對於我嚟講，夠使就得，但點先算夠呢？我對錢冇乜概念，除咗私人生活外，我最大樂趣就係做戲，當然我都會講錢，但唔係睇得咁緊要。」
八四年憑《垂簾聽政》奪香港電影金像獎最佳男主角後，梁家輝卻被發現在街邊做小販。家輝稱自己「為生活乜都肯制」，亦明白影圈是現實地，當時他拍完大陸片，不能賣埠往台灣就自然「冇人要」，家輝說：「影帝擺街又點？都要做住先，我嘅字典入面係冇懷才不遇呢啲字眼。喺電影圈唔受歡迎、拍戲賣唔到錢或年華老去，自然就會俾人淘汰，我對呢啲嘢唔計較，亦都冇顧慮轉做第二行，當然我唔係想轉行做小販，做小販只係過渡。」
有自知之明
家輝續說：「當時我仲會利用我嘅名氣吸引顧客叫佢哋幫襯吓，或者人哋覺得我落泊，但我唔覺。當時我擺完赤柱去銅鑼灣擺，銅鑼灣啲人捨得使錢，嗰陣賣遮仔、企鵝襪，有喱士邊嗰隻，廿蚊一對，相比起赤柱啲遊客千揀萬揀買一對，銅鑼灣啲客就漁翁撒網一買買五對慢慢襯，兩邊嘅消費模式好唔同。因為我嗰陣踏足過『商界』，我知我唔係商界人才，只可以做吓手作仔，當時每日諗點樣避開巿容整潔隊，研究點樣將啲貨分開擺，俾人拉到唔會血本無歸，做咗九個月，感覺都OK。」
緋聞篇–流淚知情深
當年張曼玉和梁家輝的緋聞甚囂塵上時，聽過一個傳聞，就是梁家輝特地約曼玉去餐廳，表示希望大家以後少見面，張曼玉即時「嘩」一聲哭了出來，並問家輝為何要讓外界影響兩人的感情。
見曼玉哭腳震
梁家輝對此微微一笑說：「呢件事係事實，當時傳聞去到不可收拾嘅環境，Maggie（張曼玉）不嬲同我老婆熟啲，當然同我都熟，我哋三個人一齊食飯，雜誌影到裁咗我太太，夾硬製造我同張曼玉嘅緋聞，我本來唔介意，但傳聞愈來愈過份，話我老婆默許我哋嘅關係，又話係三人行，呢啲嘢真係置身其中先會明白。我冇所謂，我又唔係偶像派唔使同fans交代，連身邊最親嘅人都明白，我真係話之你，睬你都儍啦。」
「但張曼玉係我哋嘅朋友，佢仲未嫁，將來佢識咗男仔，人哋父母又點睇呢個女仔呢？講得多、講咗幾年件事就好似變咗既成嘅事實，我同Maggie講不如大家避忌吓，少啲一齊，佢真係『嘩』一聲喊咗出嚟，仲喊到收唔到聲，嚇到我腳都震埋，唔知點收科，估唔到佢咁感性。呢件事亦令我哋嘅友誼更邁進一步，佢咁多年都係我圈中最好嘅女性朋友，佢𠵱家搵到自己鍾意嘅人，我更加話之人講乜啦。」
