人類就話有情人節又有元宵，今勻輪都輪到狗狗玩男仔女仔配對啦！天生性格外向嘅爹利可能知道有個相親大會，有機會大玩情侶檔遊戲，所以聚首當天真係……High到痹！情侶裝出場是指定動作，狗狗們都自豪地擺着尾巴招搖過市，當正自己是「派對動物」；再玩埋嘴對嘴，WOW～WOW～以為有嘢睇㖭，點知狗狗們扮晒矜持唔肯咀（應該話係唔肯食零食至真）。佢哋用行動話你知，寧願望鏡頭影番張靚相緊要啲！
記者：梁彩燕
攝影：黃子偉
鳴謝：白爹利同盟（www.westiegroup.com）
前傳：當我係柱
「甜蜜蜜情人節派對」選址旺角某樓上Cafe，小記行在街頭已經聽到爹利狗狗們擘大喉嚨嘅「傾偈」聲，梗係醒水聽聲搵架步啦，認真係「未見其狗先聞其狗聲」！開門見狗，見到二十多隻爹利，個個情緒異常興奮，睇嚟個個都知道今日除咗有得識新朋友，仲可以大玩情侶遊戲！遊戲尚未開始，亢奮的狗狗冇咩特別嘢做，有狗狗開始在場內玩「霸地頭」。唔知係咪我周身貓味，一雙美腿竟然被佢哋當正電燈柱擘腳開水喉！無辜遭殃，真係令人哭笑不得。終於等到遊戲開始，狗狗們有得寄情於Game，我都終於甩難！
求零食 不是求分數
終於到咗遊戲時間啦！狗狗一PairPair咁綁埋一齊玩2狗8足，要鬥快回到主人身邊！唏，聽落簡直冇難度可言，但玩落就知。「BB呢邊！多多過嚟呀！Mickey、啤啤呢度有嘢食呀！」要狗狗們鬥快回到身邊，旁邊觀眾就負責出動各種奇招，包括用口同用餌誘，仲要阻礙其他參賽者，大家都表現得愈來愈心急。
睇番參賽者嘅反應至搞笑，有啲狗狗好迷茫唔知行去邊；有啲就為食到爆，一心諗住食嘢第一，比賽第二！有啲就出現意見分歧，你去東咩、我偏要去西！當然梗有狗狗是目標一致的，如果唔係點贏比賽呢？賽果係，最耐一Pair……唉……都係講番贏咗嘅靚仔同呍呢拿有幾勁啦！2秒65呀！一個不留神，打個乞嗤就會Miss咗睇唔到佢哋攞冠軍！
情侶婚紗禮服至煞食
第二個遊戲《勁食餅餅嘴對嘴》開始，不過狗狗們唔知係咪怕掂到對方嘅口水會有BB呢，似乎個個都唔多夾嘴形喎！（詳情請看比賽實況）唔理咁多啦，匆匆了事之後，狗狗們至關心嘅，就係要着靚衫喇！因為第三輪比賽係要上演一幕情侶裝出Show！
雖然冇T字天橋，不過一睇就知個個主人都幫佢哋苦思過造型啦！運動裝、碎花、甚至連婚紗禮服都出動埋，不過大部份都係男襯藍、女襯紅，似乎已成為必然嘅配搭。話時話，有啲估佢唔到嘅係，整天在爹利群中穿插的貴富狗小比和小吉，都幾招搖喎！踩場呀？過主啦！
FashionShow晒造型
