中貿林去澳洲買馬，順便探訪住喺墨爾本、悉尼、昆士蘭嘅朋友，好不快活。據中貿林回報，墨爾本天氣奇佳，初秋時分，氣溫不冷不熱，舉目盡是藍天白雲。由機場坐車去拍賣場，行咗十五分鐘，道路兩旁都係草地，一望無際。中貿林講：「澳洲真係得天獨厚，大國寡民，氣候宜人，資源充足，有咁廣闊嘅綠油油草地，你話養馬幾容易吖。」
中貿林曾在昆士蘭、悉尼養馬。但係到拍賣場買馬，還是第一次。如劉姥姥入大觀園，對澳洲人育馬工業制度之嚴謹、專業，十分佩服。拍賣場連牧場，面積龐大，周歲馬散佈各大育馬牧場嘅專用馬房，買家可到馬房參觀，叫馬伕將隻馬拉出嚟行幾十步，慢慢觀察。入拍賣場之前，啲馬在大堂外嘅沙圈踱步約十分鐘，畀啲準買家睇清楚，輪到嘞，隻馬入場，買家展開競投，只要搖吓支筆，打個眼色，已經有拍賣助手吼到，大聲一嗌，就代表一口價，中貿林係初哥，驚住人哋睇唔到，一於舉手，以免拍賣員漏眼。原來到得拍賣場嘅，人人做好功課，中貿林睇血統目錄揀馬，認為唔得嘅，果然以低價出售，五千澳元有交易。中貿林認為好嘅，就爭持激烈，嗌十幾口價都未有定奪，想話執死雞呀，冇咁易，佢諗住出價五萬澳紙，就會搶到七萬八萬，佢想出價一兩萬，就會搶到三、四萬。呢個市場係perfect（完美）嘅，資訊人人有，想法多相同，讀經濟學理論之餘，要體驗何謂市場，到澳洲周歲馬拍賣會就知道嘞。復活節悉尼拍賣會係全球矚目，大馬主雲集嘅場合，大家有興趣可以去體驗一番。
想博一博，只好博運氣。中貿林話現場有好多澳洲牧場主人、練馬師，專吼啲平價馬，用五千至萬五澳紙買一匹可能有缺陷嘅靚血統馬，希望憑自己功力或運氣，將隻馬醫好或訓練好，化腐朽為神奇。當然，失敗機會係好大嘅，但萬一成功咗，「賠率」好高，可以贏大錢，但係香港馬主就冇咁嘅勇氣與眼光去博一博咯。