大家咪以為只有女人去時裝店先至會攞住成堆衫係咁試，男人老狗嘅陳小春，一樣鍾意喺時裝店左試右試，而且佢試衫嘅猴擒程度，比女人有過之而無不及。
睇貴錶混吉
早幾日小春同兩個助手去尖沙嘴新世界中心商場行街，小春攞住杯咖啡，成個大爺咁大搖大擺，又喺珠寶鐘錶公司門口windowshopping，佢對啲貴錶好有興趣，烏低身睇咗成十五分鐘，店員仲以為有生意，嗱嗱臨請小春入內參觀，點知佢齋睇唔買，搞到成班店員嘥口水。跟住小春去咗商場嘅Silouis男裝店，佢一入舖頭即刻揀西裝，但就心急到連試身室都費事入，即場試咗六、七件西裝褸。
埋單過萬蚊
其間小春試着一件勁姣橙色西裝褸後，竟然叫男助手扮模特兒着件西裝、轉幾個圈畀佢睇吓。
之後小春仲試過頭笠上衣，企正喺舖頭中間係咁搵衫笠頭，如是者除完又着、着完又除，齋試衫都搞咗個幾鐘頭。
不過，呢次小春終於有幫襯喇，關仁見佢買咗件西裝褸同一、兩件衫，埋單過萬蚊，都不枉間舖畀佢搞咗成粒鐘。
Textby關仁
