———藝人出位衣着逐個捉
陳慧琳清爽杏褸
陳慧琳：「近排天氣潮濕，最適合着乾濕褸，因為着起感覺乾爽，兼且又可以保暖。有好多人覺得着杏色嘅衫會顯得膚色暗黃，其實杏色係會搶走臉上光采，所以我建議大家搽唇膏，化少少妝，我今日就以橙色嘅妝為主。另外呢件褸用金色嘅鈕，起到一種點綴作用，令件褸平凡中帶有高貴感覺，而杏色仲係今年流行嘅顏色㖭。」
容祖兒百搭花腰
容祖兒：「我戴緊呢條腰帶係今年春夏季嘅新款，以黑白色喱士襯幼身皮帶，配搭非常簡單。將塊喱士轉喺唔同地方有唔同感覺，放喺側邊就有點綴作用，若果將塊喱士轉係正面，望落去就好似條裙仔一樣。戴呢款腰帶時，上身可以着粗豪啲嘅衫，咁就會起咗一個好大對比。」
董敏莉晶石護身
董敏莉：「平時我戴飾物就會襯番嗰日件衫嘅顏色，而且有好多都係我DIY親手做嘅。但係呢兩條黑曜石同蜜蠟手鏈就係我必戴嘅飾物，有人話蜜蠟就乜都幫到，至於黑曜石就係用來定驚同埋辟邪，我覺得幾有用㗎！」
袁彩雲愛珠公主
袁彩雲：「我本身都好鍾意穿珠鏈，所以成日會去不同地方買珠，珍珠鏈襯上去好有公主feel，除咗喱士，今年好興白色，總之身上一定要有白色，我今日呢身打扮其實可以加多少少白色，咁就係今年最trendy嘅打扮。」
採訪：馬建華、魯萍、楊潔雯 攝影：陳慧安
