立法會資訊科技委員會噚日請晒啲電台電視台，去講公營廣播，商台、港台、新城、亞記同無記都有代表嚟，淨係畸寶冇到。風水輪流轉，當日俾商台封咪嘅大班，𠵱家貴為該委員會副主席，佢就孖叉商台自從佢被迫封咪之後，就一直俾商台封殺，唔畀佢出聲，差唔多冇機會喺商台朝早節目講嘢！
商台助理總經理杜之克就話，兩年前兩位名嘴嘅成敗得失就唔講喇，總之商台嘅言論空間冇收窄到。商台同其他電子傳媒又話，希望公營廣播唔好同商營競爭，因為公營有公帑補貼，再同佢哋爭廣告同贊助，佢哋就冇啖好食啦。
卿姐即刻窒住商台話，大班毓民個節目咁賺錢，你又唔畀佢哋開咪，你呢頭驚公營競爭，嗰頭人哋幫你開咪，塞錢畀你又唔要，又猛叫港台唔好搵你哋啲錢，呢啲又係乜邏輯？卿姐問得咁好，可惜八方聽唔到商台回應啦，因為個會趕住收檔。
傳真︰2623-9278
電郵︰[email protected]