常言：「戲子無情」，出身大富之家的林峯偏偏公子多情。入行八年，先後與六位女藝員傳緋聞，其中五個都因為與他合作拍劇而傳撻着，劇接劇地戀火相傳。林峯直認他感情豐富，每次跟女藝員拍戲總會投入地愛，然後抽身，但他卻一直憂心被女對手錯愛。撰文：朱倬誼
林峯出身自大富之家，從事內地房地產生意的林父林華國坐擁六億身家，被喻為「廈門李嘉誠」。身為林家大少的林峯住舊山頂道豪宅、揸Benz跑車，連無綫中人都稱呼他做「少爺」，既靚仔兼有名有利，少爺威威追女仔固然順理成章。
「冇好感演唔到戲」
陳法拉、陳敏之、胡杏兒、楊怡、葉璇和李彩華六個緋聞女友之中，除陳法拉外，其餘五個都因為與林峯拍劇而傳撻着，他們在鏡頭前談情說愛，回到現實，也許仍然混淆不清，但真愛、錯愛抑或博愛，只有當事人自知。
有關拍戲撻着的問題，林峯說：「冇好感係演唔到戲，我哋唔係機械人，會令自己投入，唔係一號表情、二號表情，自己要代入，嗰一刻鍾意嗰個人就真係鍾意，之後唔係嗰回事，呢樣係演員必備條件，好感一定要有，唔係點演戲？但想追咩？未到。
「其實係睇自己可唔可以冷靜，返到屋企仲鑽牛角尖，係咁諗會影響工作，俾工作誤導咗自己，我都好慶幸自己冇（拍戲弄假成真），講笑咁講啦，有時太投入，都會驚對方瀨嘢（愛上自己），男仔一定係做主導㖭啦。」
揀女奄尖不能太醒
每次拍劇都傳𠝹女，林峯揚言以前會激到生蝦咁跳，但現在的反應就得啖笑：「傳緋聞同你見係兩樣嘢，難免有啲觀眾會信，亦阻唔到人哋點諗，但我身邊嘅人、朋友都冇過問，屋企人好相信我，唔好影響大家做朋友最緊要。」
林峯繼續解構他的愛情觀：「私底下我其實唔係咁隨便嘅人，如果唔係我身邊就唔會有咁多朋友，識我嘅人都知我揀擇。好矛盾㗎，我揀女仔唔可以太聰明，又唔可以唔醒，我唔鍾意解釋，吓吓做乜都要講，頂唔順。
「同一班朋友飲吓嘢、食吓飯，係好正常社交活動，每次都有男有女，有好感嘅異性可以再進一步，但一係自己驚，一係人哋驚過你。我只係想好普通咁食吓飯，入行之後都未做過。」
戲子有情必須尊重
入行八年來，林峯與不少資深演員合作過，但至今令他緊記教誨的就有羅嘉良和古天樂，他說：「撈家（羅嘉良）教我演戲、心態上點處理，佢好錫我，又話畀我聽做人道理，由生活到工作上都肯教。佢同我講過，話做演員好值得尊重，人哋成日話戲子無情，我哋至係最有感情嘅動物，演戲時係欺騙緊自己嘅感情去娛樂觀眾，所以我好尊重職業。
「另一個係古仔（古天樂），佢會教我一啲緋聞嘅處理方法，佢話唔係事實嘅嘢唔回應，我唔鍾意解釋，你信就信，唔信就點解釋都係冇用。」
攝影：葉君海
服裝：上海灘（牛仔褲為藝人私物）
場地：一號銀海
