受到新濠國際（200）收購賭牌交易刺激，澳門賭股昨日全面大反彈，新濠勁升26.4％，收14.60元，至於家姐嘅信德集團（242）同樣掂，升7.1％，收9.10元，連靜咗好耐嘅銀河娛樂（027）亦升6.9％，收5.45元。
經紀黃話，新濠今次大嗱嗱拎1.6億美金同澳洲公司合作買賭牌，出價唔係平，真係唔知幾時可以回本同埋有錢賺，更有人擔心公司或者要大開抽水機，但外資大行幾乎一致叫好，所以升得咁勁。
另外，創業板奇葩之一的威高股份（8199），將於3月17日公布全年業績，但股價已經先行偷步炒上，昨日升7.7％，收2.80元。
經紀黃叫小初唔好睇小威高股份，隻股上市以來一直交到功課，盈利不俗之餘又有息派，創業板股有咁好表現仲想點？睇番之前3季業績，季季都有唔錯升幅，全年業績實見得人。威高股份去年11月以1.35元配過一次股，之後股價在4個月內升咗1倍有多，當日認購的芬佬當然賺到笑。
慕容小初