新昌國際主席葉謀遵博士噚日去城大演講，自稱廣東話唔流利嘅佢，會後遇到個上海嚟嘅城大學生，用純正上海話向佢提問，佢都不知幾開心。唔講唔知，葉謀遵二十歲開始打煲呔，呢個習慣足足有成半個世紀咁耐，早過BTT多多聲，煲呔藏量多到佢都唔記得！
佢同八方講，退休後都仲有返公司行吓，時間就冇定，得閒就搞吓私人投資，入吓馬場，睇吓佢嗰幾隻「乜乜的」「物物的」馬仔，再唔係就同人打吓橋牌，捉吓圍棋，生活不知幾悠閒。
佢又話，一年前先開始學打Golf，成日搞唔清方向，打到亂晒龍，所以多數都係同老婆一齊打，事關一個海軍，一個水兵，大家「水鬥水」！如果有朋友約佢打波，佢都會應約，通常係人家喺前面打，佢兩公婆就喺後面執波。
八方記得，葉謀遵以前成日一家人去滑雪，之不過老婆因為滑雪受傷，做過五次手術，最後醫生都話，葉太咁嘅年紀，唔可以再滑啦，所以去少咗。葉謀遵話，唔去得滑雪，咪同太太去多啲旅行補數，返國內玩，之前剛剛先去咗昆明。
傳真︰2623-9278
電郵︰[email protected]