今年電影節，由劉德華帶領百人嗌支持口號開始，已經表明態度大眾化。講緊嘅唔係戲飛嘅價錢，而係所選嘅電影。有最啱想快人一步率先睇電影迷嘅《黑社會2》、有照顧動畫迷「特撮」迷嘅《太空戰士Ⅶ：天子再臨》、《幪面超人TheFirst》，當然Cult人電影人最愛嘅大師級、深奧電影繼續大量登場。Sorry，開幕電影《黑社會2》開售兩小時已經爆滿，但係導演杜琪峯有好介紹，可以跟住佢口味頂住癮，遲啲等正場先「以和為貴」啦。
記者：馬慶武
攝影：陳陶鈞
「《柔道龍虎榜》最有情懷！」
兩小時迫爆網頁，破電影節紀錄火速爆滿，開幕電影《黑社會2以和為貴》氣勢強勁，「我諗係啲人好奇，想睇吓第二集發展會係點。又或者觀眾都感覺到第一集只係開端，想快啲睇埋結尾。」杜Sir對此似乎無乜感覺，可能因為係意料之內，亦可能因為太忙，事關今年電影節好多嘢都關佢事。電影節Poster由杜Sir拍攝、順勢重開埋個人首個攝影展，而且今年係以杜Sir、韋家輝為首嘅「銀河映像」10周年，一系列電影都會喺電影節登場。
「我都講過好多次，喺自己嘅作品中最鍾意係《柔道龍虎榜》，部戲表達到我想拍嗰種風格同情懷。」杜Sir話今次「銀河」嘅精選電影唔係佢親自揀，但都好合佢心意：「《柔》上畫時口碑麻麻？我又唔覺得特別失望，之前《一個字頭的誕生》、甚至《暗戰》都俾影評鬧到死，但係之後啲人又接受到，重喺好多外地影展參展，有時觀眾需要時間理解。」
「《地獄莊園》捧大師場！」
電影節好戲雲集，有無港產漏網之魚？「我近排真係無乜睇過邊套港產片覺得掂，我自己嗰啲都唔掂啦，哈哈！今次電影節我推介一套《地獄莊園》（Manderlay），係《人間狗鎮》導演嘅作品，馮特艾爾係近年我最欣賞嘅導演，純粹捧佢場。」講電影佢唔推介自己電影，講電影節杜Sir亦唔Hardsell自己個影展，唔問佢真係一句都唔提。
「影相係興趣，平時喺片場，啲副導最多嘢做之嘛，我成日可以周圍影吓相。我覺得有啲嘢係愈錯愈好，所以我得閒會亂咁影相。最深刻係有一次影劉德華，嗰陣拍緊《大隻佬》，影咗張相出嚟，唔係好似劉德華喎，同平時見開嗰個唔同，但係又好似似曾相識，呢種感覺好特別。」今次影展杜Sir話攞咗十幾幅相出嚟，不過就未知到時會展出幾多張。有興趣探討杜Sir用另一個角度另一種工具表現出嚟嘅片場世界？要睇喇，免費㗎！
杜琪峯攝影展
地點︰港島東英皇道979號太古坊德宏大廈一樓大堂
日期︰3月20日至4月15日
時間︰8am-9pm
免費入場
影評人推介
畢明：「《半熟爸爸》探討一啲社會問題，係震撼版嘅《獅子山下》，戲味濃；《隱藏的恐懼》導演米高．漢尼卡好識表達人性陰暗面，之前嘅《鋼琴教師》都好睇，康城影展重攞過最佳導演，有保證；之後《地下觀音》嘅導演係英國嘅邁克．李，最拿手從不同層面剖白女人心，表現手法可能好平淡，但好到肉。其實電影節我重有好多戲想睇㗎，不過你話3套夠，算數！」
推介影片：《隱藏的恐懼》（Hidden）、《半熟爸爸》（TheChild)、《地下觀音》（VeraDrake）
亞里安：「《猛鬼也投票》個故事大綱吸引，竟然用喪屍片講反美，用死去美軍翻生去投票批判布殊，勁！」
推介影片：《猛鬼也投票》（Homecoming）
繼續吹氣戶外睇戲
今年電影節仍會喺添馬艦舉辦吹氣電影城，而電影嘅對象就明顯係一眾年輕人，甚至小朋友。小影迷可以揀《小孩不笨》第2集、大少少嘅就可以睇喺日本都無喺戲院上過嘅《太空戰士Ⅶ：天子再臨》，至於中年電車男就咪放過《幪面超人TheFirst》啦，套套都係喺香港首映，而且未必會喺戲院上正場！
電影節小資料
日期：4月4日-4月19日
節目及訂票手冊派發地點：通利琴行、Starbuck等等
查詢：29703300
網址： http://www.hkiff.org.hk
《太空戰士Ⅶ：天子再臨》
將著名電視遊戲嘅延續拍成CG電影，日本只曾推出過DVD及UMD，香港觀眾有幸可以喺大銀幕睇到。
幪面超人TheFirst》
重拍1、2號故事，濃縮加上現代特技，定必更好睇，主角應該唔會叫洪大龍喇啩？
《小孩不笨2》
新加坡兒童電影續集，電視劇版曾在港播放，一樣受歡迎。
