Ape香港於4月1日開張。未開張前，港九新界的Ape水貨店生意突然急跌，平時最多人搶住要的猿人頭XL碼T恤，𠵱家唾手可得，仲有價講！潮流特區地庫一名不願透露姓名水貨舖老細：「始終有班客覺得Ape𠵱家嚟咗香港，唔及以前咁馨香，咪轉玩第二個牌子囉。另一批客就寧願等專門店開，儲定彈藥即場掃貨，水貨舖呢輪生意實有影響㗎喇！睇嚟啲二、三線水貨舖將會陸續捱唔住執笠。不過Ape始終都係一哥，死唔晒嘅！」一雞死一雞鳴，呢輪於水貨舖頂替Ape位置就係Undercover，同埋Number（N）ine。
巡吓潮流特區地庫同銅鑼灣板前壽司附近，就見到各水貨舖display換上Undercover，無論係柴灣嘅特別版定係日本返嘅水貨，銷情十分不俗。總統商場水貨界新才俊高佬Dee：「今年唔知點解大家轉玩斯文內斂，唔搞囂張浮誇，黑沉沉嘅UC同九號仔就食正個勢賣個滿堂紅，連加拿大班華人fans都嚟香港掃貨，連帶Comme都賣得唔錯！Ape真係要諗諗計，咪一味食老本喇！嚟緊UC有對『哈哈笑』鞋複刻，又係必搶，着住佢襯埋件九號仔骷髏頭tee，哈哈，話之你話我係fashionvictim，仍然不失為今年最型最潮嘅打扮！」
大食Jack（[email protected]）