本地漫畫迷有幾多？淨係睇每年漫畫節嘅墟冚情況，都唔使多費唇舌解釋啦。本地漫畫潮流都係以追日本漫畫為主，本地漫畫為副，連漫畫Cafe經營方式都有跟貼日本方面嘅趨勢，日本後生仔玩Cosplay玩到癲，香港終於亦追上連CosplayCafe都有埋；不過歸根究柢，漫畫Cafe最重要都係漫畫種類多、數量夠才是王道，例子？來港只有短短兩年多，台灣大型連鎖漫畫專門店十大書坊已經連開17間分店，就係最佳明證。
記者：吳小明
攝影：陳陶鈞
Model：Yankee&Pakho
漫畫圖書館夠專一
有別一貫漫畫Cafe的經營模式，十大書坊嘅賣點，就係提供一個簡簡單單、乾淨舒服的環境，可以靜靜煲漫畫，無早、午、晚、常餐茶餐提供，亦唔會有有線睇波、啤牌象棋等花臣，只有超過兩萬本港日漫畫等住你睇。整間Cafe燈火通明，座位舒服整潔，漫畫全部用包書膠包好，藏書佔7成以上係漫畫，其餘才是流行中文小說及潮流雜誌，說是一間漫畫圖書館也不為過。觀察一個下午，上環分店以西裝骨骨白領一族上嚟睇漫畫兼食Lunch為多，雖然書坊唔做餐飲，但容許客人叫其他食店外賣喺書坊內食，亦有少部份卡位設有電腦上網，照顧一心二用嘅漫畫迷。
本地薄裝漫畫最齊
十大書坊另一強項，是本地薄裝漫畫夠齊，連《中華英雄》創刊號都有、舊版《龍虎門》期數亦好齊，咦，彩記編輯你係《龍虎門》死忠Fans喎，仲唔入會？
梗有一本啱心水
十大書坊（28518133）
地址：上環德輔道中279號豐和商業大廈1樓
營業時間：9am-11pm
座位：40個，設有獨立卡座
收費：會員每小時收費$15/非會員$18、漫畫外借：$4-$5/本
五大最「搶睇」漫畫
據店員姐姐表示，近期最「搶睇」漫畫都係清一色日本漫畫，仲要係男仔界別，少女漫畫唔入榜，《NANA》、《電車男》都Out咗㖭呢。
日本有三陪美少女
相對香港，日本漫畫Cafe當然玩得盡好多，例如這間位於秋葉原的LittlePSX，有三陪美少女斟茶遞水陪吹水。LittlePSX雖然骨子裏原是蛻變自MaidCafe，但侍應除了扮女傭之外，更加會扮演其他漫畫和Game人物，造型更多元化，佢哋除咗一般Serve客外，更加會同客人打成一片，陪客人一齊打機、吹水，感覺就如朋友，氣氛融洽。
LittlePSX
地址：千代田區外神田3-10-3Isamiya第一大廈4樓
網址：www.littlepsx.com
全港唯一CosplayCafe快換舖
對Cosplay迷來講，「齋睇漫畫Cafe」滿足唔到佢哋，當然要去全港唯一一間CosplayCafe「漫畫堂」啦，不過生意好，現有舊舖已不敷應用，現正物色新舖擴充，目前未知確實搬舖日期，要趁未搬舖裝修暫停營業前，快啲去多幾次幫襯吓嘞。
CosplayCafe漫畫堂（23321089）
地址：旺角彌敦道577號高氏大樓2樓A
營業時間：3pm-2am（星期日至四）、3pm-3am（星期五及六）
收費：會員每小時收費$15/非會員$18；另凡惠顧飲品送一小時任看漫畫
香港首間《花生》漫畫主題Cafe
就算唔睇漫畫，都有漫畫主題Cafe可去，尤其剛開業不久、全港首間《花生》漫畫主題餐廳CharlieBrownCafe更加值得到此一遊，有巨型史諾比及查理布朗雕像、多個漫畫角色首辦模型、印有花生漫畫角色天花及枱櫈、來自美國的限量版模型等等，仲唔夠理由咩？
CharlieBrownCafe（23888202）
地址：旺角登打士廣場2樓
座位：70個
營業時間：11am-12mn（星期日至四）、11am-3am（星期五、六日及公眾假期前夕）
平均消費：午餐$60、晚餐$80、消夜$50
歷史悠久年中無休
佐熊之家以年中無休為號召，難怪咁多年都依然站得住腳，全店分兩層佔地四千多呎，設有7個房間，有超過15,000本漫畫，仲有得上網打機、有線睇波，就算係一支公去到都不愁寂寞！如果三五知己一齊更可Hea個痛快，連一人一鍋打邊爐都有㖭呀！
佐熊之家（28381322）
地址：銅鑼灣謝斐道496號金利文廣場3/F及12/F
營業時間：24小時
座位：100個，設7間房
收費：$24/小時，飲品任飲
