個市渾渾噩噩，恒指埋單跌65點。新濠（200）復牌，高開之後再高收，收市前8分鐘，由14元踢上14.60元埋單，全日急升26%，市場活動家手法技驚四座。
新濠C輪2169：新濠升，獨家C輪2169收70仙，升56%，有6.1球易手。隻輪街貨得2.64球，好少人發大財。12月中到期，溢價8.8%，槓桿率2.1倍（有效1.8倍），引伸波幅82%。睇吓槓桿率，就知道隻輪已經冇乜值博率。要博，正股好過。只不過，正股Size去到190億元，要繼續挾上，要好多子彈。C輪與正股，兩件都咪制，睇人表演算數。
信德C輪3819：新濠意氣風發，信德（242）亦掂檔，收9.10元，升7%。
信德C輪3819與9643，分別急升34%同38%。3819喺6月尾夠鐘，輪價18.5仙，溢價2.8%，槓桿率4.9倍（有效4.1倍），引伸波幅42.7%，數據靚過9643少少，但都係博唔過，提防正股有回吐。
港燈C輪4763：港燈（006）多賺多派，末期息1.01元加特別息0.73元，合共1.74元，相等於股價4.8%。股價升0.25元，但C輪冇乜着數，4763散夠20%。
隻輪9月尾夠鐘，輪價27.5仙，負溢價3.4%，槓桿率13.1倍（有效9.9倍），引伸波幅14.4%。計埋除息因素，隻輪有輕微溢價，有唔錯槓桿率，好似買得過。但正股鍾意橫行，揸輪易嘥機會成本，咪搞佢。
章盛