7、80年代，香港出現俗稱小露寶嘅卡式帶Hi-Fi，以流動性及聲大大炸機做賣點，可算係一代沙灘、開P至潮恩物！到咗06年，居然輪到蘋果電腦睇中呢個市場，為iPod加入特大喇叭，賣相索爆之餘，仲可入6粒乾電拎出街炸機！
記者：朱崇德
攝影：陳偉強
ImageGirl：Charlie
一隻2.1聲道喇叭，竟可上電腦版頭條？起初我都懷疑過；直到實物在手，清麗嘅音質、強烈嘅層次感，在喧鬧嘅銅鑼灣街頭炸機，6粒大電竟有令途人側目的靚音效，真係無話可說；若問呢部iPodHi-Fi可有缺失，相信是欠了4隻專業音響使用的針腳，音效應可更上一層樓！
6代iPod都啱用
$2,800一個喇叭，比起一般細廠肯定整到佢幾十個選項調校、又閃燈又LED咁，務求要買家覺得抵為止；不過iPodHi-Fi只有機頂+/-音量兩個掣，設計之簡約，與歷代iPod可謂襯到絕！
iPodHi-Fi機頂設有一個UniversalDock，只要將iPod接上就可播歌。除Shuffle要經機背嘅3.5mmAudioJack接駁外，其餘6代iPod均附有專用底座直插機頂；為了達致最完美的音色，iPod的主選單內，還會新增了一項Speaker選項，用家可由此操控iPodHi-Fi的高、低音量。
獨特設計防諧震
機身設有兩個80mmWide-Range錐形振膜的中高喇叭，和一個130mm低音單喇叭；機身顏色則沿用了iPod系列最經典的黑、白設計，Size只是略大於一部普通家用Printer（167.6×431.8×175.3mm），不過重量則高達6.6kg。就現場所見，機身外殼使用了差不多5mm厚度的膠料製造，再加全金屬黑色面板，用料非常重手，好處係除咗令機身更堅固外，亦防止了同類喇叭因「諧震」的問題，而有雜聲的情況出現。
就實地測試，記者在炸爆Volume情況下，白色機殼都仍然紋風不動，穩如泰山，只是面板有些許的微震，Apple真係所言非虛！
專家實試iPodHi-Fi
今日搵嚟星期日喺《煲碟王》寫「發燒正碟」嘅DavidLee實測吓呢部潮物；意外收穫係遇然邂逅資深玩家蕭先生，擇日不如撞日底下即場品評呢部新機！
罕見音色清麗開揚
低音反射式設計，真係有防諧震效果，音色是所有iPod專用喇叭中，罕見做到有開揚、唔侷促嘅感覺！整體音色可以用「清麗」形容，市面就算過$4,000的MiniHi-Fi都明顯唔夠佢揮，相信加「針腳」後，音色會更靚。
人聲表現有肉地
動態音色唔單止做到量，而且亦有質感，放在4、5呎面前，感覺就好似有道「音樂牆」在前面，相當有驚喜！MP3音樂較難做到的中高音，都做到有強烈的線條效果；另外要一讚人聲表現好有「肉地」，夠清晰、又富層次感！
80呎外依然靚聲
6嚿大電可有幾好聲？記者玩過80年代嘅小露寶，大膽講句，10呎範圍已不辨人聲；但在怡和午炮實試iPodHi-Fi時，相距80呎之遙，夾在告士打道及避風塘嘈雜聲之中，iPodHi-Fi仍可以有清晰音效同「樂器齊全」的感覺，真係好嚇人！
鏡頭以外
所謂靚機會知音！街訪中的蕭生，其實是記者在怡和午炮影相時遇到的iPod用家，佢係因為聽到iPodHi-Fi的靚音效而加入測試行列的實際用家；眼見佢戴住個$800的GRADOSR80耳筒，都可以大讚iPodHi-Fi靚聲效，問現場聽眾嘅親身感受，觀點絕對靠得住！
