一眾代理吊咗幾個月鹽水，等到頸都長埋先等到發展商有大盤開賣，就係長實嘅葵涌雍雅軒，梗係搏命扯單啦，收番啲佣救吓命，所以代理行亦加多兩錢肉緊幫發展商宣傳。搞完誓師會，又搞送嘢儀式，總之務求令個盤多啲曝光。
噚日四大代理行就輪流送嘢畀發展商，祝賀樓盤銷情熱爆燈。中原送上一大盤「紅辣椒」同用辣椒砌成嘅「王」字畀長實，喻意係開紅盤。而對手美聯就送象棋，喻意「旗開得勝」喎。
利嘉閣送嘅係成隻鷄蛋咁大粒嘅水晶音樂盒，打開仲會轉嘅，代表物業會轉嘅圓頂天幕會所咁閃爍。至於香港置業就送咗座「摩天輪」畀發展，話代表樓盤啓動樓市喎。
四大代理行絞盡腦汁，氹得發展商非常開心，都係因為一手盤已對變成佢哋嘅命脈，咁大個米飯班主，又點可以唔盡力討好呢？舊年發展商提早收爐，搞到代理連蝕幾個月，亦可反映發展商對代理嘅響力愈嚟愈大。