數本地漫畫經典，已出版36年嘅《龍虎門》一定排首位，等咗咁多年，電影版終於拍竣並定於今年暑期檔上映，一眾由細睇到大的Fans，最關心梗係陪住佢哋長大的經典角色、經典功夫，可唔可以保留到原汁原味。打鬥場面找來甄子丹設計，據講下下硬橋硬馬，唔會一味玩CG，不過未有片睇住，惟有睇造型先，Fans一睇個個都有意見，乜話？連黃玉郎都唔收貨？
記者︰劉昱蘭
攝影︰陳盛臣
火雲邪神（釋行宇飾）
如果唔事先講明呢位係火雲邪神，真係失覺晒。雖然火雲邪神係戴面具，咁唔係戴咗面具就等如邪神，起碼你都整番個長髮，個型似啲，又有氣勢啲。但其實加番對角，咪一天都光晒囉。
「火雲邪神竟然無角！」
黃玉郎同《龍虎門》出生入死咁多年，一班經典角色就好似佢親生仔咁，講到佢3個仔（龍虎三皇）佢就話好滿意，但一講到經典奸角火雲邪神，意見就180度轉向，黃玉郎難掩失望之色，直言完全唔似︰「造型上最能代表火雲邪神的，就係嗰兩隻角，但個電影造型就偏偏一隻角都冇，冇晒特色！」
火雲邪神——經典港產奸角
火雲邪神40多年來係一個不滅的奸角，直至2000年代的電影，都用番佢作為邪派中最厲害的無敵人物，好似周星馳的《功夫》咁，斧頭幫頭號殺手，就係用番火雲邪神做奸人。其實火雲邪神早在漫畫《龍虎門》之前，已經出現於60年代電影《如來神掌》。咁多年來喺香港屹立不倒，夠經典未？
三皇造型玉郎讚！漫畫迷踩！
好彩有3個仔爭番啖氣，緊身背心和喇叭褲，都令三皇有嗰種70年代初的《龍虎門》懷舊味。尤其係余文樂飾演的石黑龍，嗰件綠色背心印有蠍子，跟足原著。而且黃玉郎覺得，3位主角氣質同性格，同漫畫版都好相近。
可惜漫畫迷唔領情！可能係因為由細睇到大，龍虎三皇好似有血有肉咁，陪住大家成長，所以𠵱家有電影真人版，大家都好奄尖，一有乜唔似嘅地方就要狂數一番。尤其我哋搵來幾位資深漫畫迷，閒閒地睇咗十幾二十年《龍虎門》，例如我哋搵來做評審嘅Kim，就係「小流氓研究所」網主（ http://www.geocities.com/ruffianhk/），佢評《龍虎門》，你要聽！
王小虎（謝霆鋒飾）
黃玉郎：「5年前開始籌備電影，一早已覺得謝霆鋒最好，眉宇間有王小虎的氣概，又夠靚仔。嗰陣時謝霆鋒怕王小虎係家喻戶曉的英雄，自己唔夠神髓和功架而推辭。後來再三邀請打動咗佢，而且佢個樣又成熟就更有英氣。」
王小龍（甄子丹飾）
黃玉郎：「甄子丹份人本身就CoolCool哋，咁王小龍係龍虎三皇之中，比較成熟冷傲，甄子丹淨係企出嚟都已經入型入格。」
石黑龍（余文樂飾）
黃玉郎：「余文樂本身夠幽默生鬼，啱晒石黑龍跳脫的角色。而且余文樂同石黑龍一樣咁好勝，余文樂從來沒有接觸過武術，但經一個月苦練，就能駕輕就熟，性格真係同石黑龍似十足。」
馬小靈（董潔飾）
「披頭散髮似黑幫！」
Kim（網頁「小流氓研究所」網主）
睇《龍虎門》幾年︰幾十年
「甄子丹就話要摟住塊面，先有王小龍的神髓，點解謝霆鋒同余文樂都要披頭散髮？石黑龍應該係髮型清爽露額，余文樂就完全相反，好似成班黑社會咁。」
「王小虎太邪！」
黃生（玩具精品店老闆）
睇《龍虎門》幾年︰廿幾年
「謝霆鋒係靚仔，但個樣有少少邪邪哋，真係唔夠正氣。仲有，佢又唔係王小龍，做乜又要長頭髮摟住塊面？另外唔鍾意甄子丹個髮型，好似夾硬戴個假髮上個頭咁，肉酸兼恐怖！」
「王小龍太老！」
King（玩具精品店老闆）
睇《龍虎門》幾年：十幾年
「漫畫版嘅小龍企埋小虎同石黑龍度，大家都係十八廿二。但甄子丹都成43歲，同謝霆鋒、余文樂一齊，真係老咗啲喎！」
「余文樂唔得」
Matthew（扭蛋玩具店老闆）
睇《龍虎門》幾年︰廿幾年囉
「余文樂個樣青靚白淨，要佢舞雙截棍，硬橋硬馬打功夫，唔係好夾！謝霆鋒拍過動作片，打得嚟都好睇啲。但佢件衫有啲求其，余文樂都有件綠色蠍子背心，點解霆鋒又唔着番閃電Logo衫呢？」
「馬小靈幾純！」
Johnny（文職）
睇《龍虎門》幾年︰十幾年
「粗眉大眼呢啲經典Look，佢哋全部都冇，講造型最似係甄子丹，不過得遮住睇唔到嗰半邊面喎！反而女主角馬小靈（董潔）個Look就幾清純，希望佢演到埋刁蠻任性的性格啦。」
造勢！《龍虎門》出電影版漫畫
先由漫畫改編拍成電影，再由電影改編番漫畫，《龍虎門》真係有排玩。新一輯《龍虎門》電影版漫畫，造型、人物、故事會根據電影情節發展，所以就算你睇咗《龍虎門》36年，都一定有新鮮感。呢輯漫畫𠵱家重趕緊工，3月27日先推出，逢星期一出版，每本$14，創刊號送電影花絮VCD。
