張栢芝同老外男友Jeroen嘅關係欲斷難斷，佢自稱同老外分手後，好幾次被發現到訪老外跑馬地嘅屋企，早幾日仲有報道話老外不滿栢芝唔得閒陪佢而發爛渣，搞到栢芝半夜走上男友屋企安撫佢喎。
表情木獨
前晚老外又孤零零，蒲咗去以前成日同栢芝歎糖水嘅跑馬地蓮園糖水舖，仲一晚食成兩次糖水，都咪話唔無聊。佢喺夜晚八點幾，一身T恤、短褲街坊裝兼踢拖，一支公由屋企行去糖水舖買外賣，佢邊行邊𢱑籮，表情木木獨獨，買咗兩碗糖水外賣就即刻行返屋企。
到半夜十二點幾，老外同兩男兩女華籍朋友又喺糖水舖出現，當時佢換咗T恤同長褲，坐喺舖頭入面同朋友傾偈，人哋成雙成對，佢就戇居居咁陪笑，仲拎起電話猛睇sms，但佢個樣就好失望，相信栢芝都冇同佢短訊傳情，唔知係咪因為見同枱班朋友表現恩愛，自己就寧舍冇癮，所以食飽後就先行番歸。
話時話，栢芝本身工作咁忙，一時搵吓舊愛謝霆鋒，一時又行街昅吓陳冠希，邊有咁多時間黐住老外拍拖吖，唔嗌交至奇呀。
