李克勤簽畀我時已經係TVB契仔，我同佢○一年《飛花》隻碟時開始合作。佢份人聰明，有巨星嘅quality，包括巨星嘅麻煩嘢，當時我太熱切想畀條新路佢行，殊不知佢係受唔到新路嘅，只可以喺舊路變化，佢唔能夠創新，好多局限，係同佢嘅歌聲、性格有關。
重複自己行舊路
佢同我講話Filarmonica（香港管弦樂團）做騷加完又加，我話關我乜事，仲話佢愈喺舊路行嘅話會愈行唔到出嚟，當時好多人勸我，話同佢錄音啦，咁好啦，我同佢做碟，無論做件事嘅中間我同佢有乜嘢過節，隻碟《港樂．克勤LIVE》出咗之後好爆，畀咗我光輝嘅一頁，事後我同佢道歉，但我仍然好硬頸咁同佢講，你係行返條舊路，嚟緊你話做乜咪做乜囉。佢到今時今日都係行緊舊路，只係加啲新嘢落去，或者佢真係唔需要加新嘢，或者應該繼續搵郎朗彈琴。
同行緊運嘅人傾嘢，無論自己嘅運幾好，都唔使教佢點行，跟住佢行就得嘞，但歌星冇運，就要佢跟你。當初克勤同阿倫（譚詠麟）好想一齊做一嚿嘢，克勤諗咗個名「左麟右李」，我話呢個名天下無敵，但阿倫唔係好鍾意，佢又諗咗個叫「雙龍出海」，我覺得唔得，去到尾係國忠（阿倫及李克勤的共同經理人張國忠）拍板一齊合作，佢兩個真係正到暈。其實我同佢好friend，我惹官非嗰陣去睇佢嘅演唱會，雖然開咗場先入場，但佢知我喺度，佢喺台度話「我有個朋友嚟咗，每個人嘅人生都有起落，我喺度送呢隻歌畀佢」，佢送咗隻《紅日》畀我，我亦相信呢隻歌係畀咗佢嘅祝福我，等我安然度過咗場官司，呢啲係錢買唔到、係人與人之間關係。
凡事算盡似巨星
佢今次演唱會都留咗飛畀我，我唔敢入後台，驚要派利是，佢講過苑淇（陳苑淇）可以上去（演唱會）唱，但最後度唔掂期，佢一直好support我。
克勤係一個非常計算、非常精密嘅人，好有自己嘅諗法，一個深思熟慮嘅人，離開做巨星嘅道路已經唔遠，因為只有巨星先會算到好盡，諗到好絕。我同佢嗰陣嘅所謂嗌交，只係做新聞，只係做戲，假嘅！所以奉勸大家，娛樂新聞只係娛樂大家嘅啫。
撰文：張止寒 口述：陳少寶
此欄逢星期六刊出
陳少寶（小寶）：曾是商台名DJ，先後擔任新藝寶、寶麗金唱片公司高層，一手捧紅王菲、Beyond，並曾和張國榮、許冠傑等巨星合作，九九年加入環球唱片任總裁，○三年離開，現為陳苑淇經理人。
