淺水灣道五十六號呢個豪盤，今個月頭十日，已錄得三宗買賣，超過二月份全個月，最新一宗係雙號複式，三千二呎，賣咗五千萬，呎價一萬五千六。
呢個盤熱賣嘅最大原因，係二手市場冇貨，買得起動輒半億豪宅嘅富豪，主要係買個地段，唔係諗住賺錢，所以入咗貨之後放盤嘅絕無僅有，相反，買完又買嘅情況好普遍，貨源有入冇出，賣少見少，好多客睇啱就買，賣樓節奏加快咗好多。利嘉閣區域董事趙保杰話，個盤由○四年開始拆售，賣到𠵱家都冇乜加價，現價相對同類豪宅好吸引，佢估計，今個月至少仲有四、五宗成交。
另外，山頂知名豪宅LaHacienda，分層單位有成交，突破近一年半悶局。香港置業營業經理李本榮話，B座高層二千七百呎兩房單位，三千零六十萬易左手，呎價超過萬一蚊，創九三年至今嘅十三年新高。
電郵地址：[email protected]