古語話十年人事幾番新，但在特區政壇，一年已經太長。噚日，八方上去灣仔東方海外總部，事關呢間前特首董建華家族嘅上市公司，又到派成績表的時候。今年，個記者會氣氛就輕鬆得多。
記得去年嘅三月十號，東方海外亦係在嗰日見記者講年度業績。佢哋當年盈利五十二億港元，勁升一倍，又派高息又送紅股，本來交盤咁靚嘅數出嚟管理層一定好開心，但現場氣氛就緊張到不得了。八方記得佢哋個投資公關、曾經做過行政長官辦公室特別助理嘅沈志澄板起晒塊面，其他高層亦係咁意耍吓記者就拜拜。點解？皆因當日董建華宣布辭職。
收息賺到笑
眨吓眼一年過去，董生變咗政協副主席，煲呔住咗入禮賓府，三司換咗兩個，高官易位就更加不計其數，最妙嘅係以前挺董嘅變咗倒曾，大反派又變咗煲呔針……唯一冇變嘅係董家嘅生意依然咁好賺。
啲人話航運業見咗頂，但係東方海外噚日又宣布佢哋去年盈利高達五十億港元，依然靚到爆燈。末期息派一個一毫七，全年股息每股兩蚊一毫一。董家合共揸住四億二千四百幾萬股，單係收息，去年已經袋咗九億大元。
去年董生話腳痛唔撈之時，講過話一定唔會加入其他機構，就算自己屋企嘅生意都唔會再插手。冇所謂啦，得閒可以湊吓孫囉；況且身為領導人都唔會好得閒。好似兩會期間，佢亦有北上，仲喺北京同呀馬交鏵及舊部屬煲呔大隊長在會場寒暄。公司生意，有細佬董建成睇住，乖仔董立新亦入埋去幫手，使乜自己操勞。過百億身家，雖然冇李浮雲咁威入到福布斯世界富豪榜前列，但都夠傲視煲呔啦！
至於東方海外嘅小股東，就唔係個個開心喇。雖然公司依然賺大錢，但係一年下來，股價由近四十蚊，跌到昨日二十八個兩毫半，有息派都唔係咁happy呢。
傳真︰2623-9278
電郵︰[email protected]