馮仁昭四圍超:千嬅任摸老竇大讚

馮仁昭四圍超:千嬅任摸老竇大讚

由楊千嬅、任賢齊同谷祖琳等主演嘅新片《天生一對》,截至大前日上畫六日累積票房五百幾萬,成績唔錯,前晚《天》片就喺灣仔擺十圍酒慶功,千嬅、小齊等全部到場舉杯祝酒同切蛋糕,氣氛都幾熱鬧。

老婆未睇片

千嬅仲自爆話佢教書嘅爹哋最初睇報紙見登咗佢同小齊嘅親熱劇照時,曾經黑面四粒鐘,到佢爹哋入場睇完《天》片之後,居然轉軚,唔單止讚個女演得好,重讚部戲有意義,搞到千嬅鬼咁開心。
片中飾演乳癌病人嘅千嬅要除衫露Bra兼俾扮演醫生嘅小齊摸胸,難得套戲收得,搞到千嬅喺慶功宴上踎喺枱底仰天喪笑。
而小齊就話佢老婆Tina暫時未睇過部戲,但唔驚老婆見佢摸千嬅胸而詐型,小齊仲話:「公還公、私還私,平時唔會特登去摸。」
小齊年前喺電影《203040》中飾演一個性飢渴男人,佢話嗰時拍完之後,唔知有幾多女人讚佢做得好,勁冧佢做一日要七次嘅性鬥士,但問到佢現實中一日要幾多次時,小齊即刻尷尬到嘔,三扒兩撥扯開話題。

谷祖琳即場示範驗胸,以佢豪放女嘅個性今次算小兒科啦!

千嬅踎喺枱底都開心到仰天喪笑,乜佢唔係要擺脫大笑姑婆嘅形象㗎咩?
前排左二起:杜琪峯、楊千嬅、谷祖琳、林家棟