大市反覆，成交亦縮，但上升股（不計認股證）就遠比下跌股為多，係463比195，大勢係繼續個別發展。
升幅超越10%的就有25隻，而且好多隻都有大成交、㷫烚烚。麗新系最威水，4家公司全部上名，豐德麗（571）升得最勁，有14.8%進賬，而排第22位同23位嘅麗新國際（191）同麗新發展（488），都大升12.1%同10.9%；麗豐控股（1125）做咗15分鐘後停賽，但已經成咗1.28億股，場面夠晒墟冚。麗新系今次重組，有基金同大行護航，家吓仲只係起步，有排玩。
其他有消息嘅勁升股，仲有中油潔能（260）升16.3%，玉皇朝集團（970）升15.2%，同雅域集團（1229）升14.1%。
玉皇朝搶上0.68元收，大升9仙，成交亦大增到2000萬股，動力強勁。消息話集團同中央電視台合作嘅「神兵小將」動畫劇，好快可以播出，今次玉皇朝成功打開內地市場，加埋文具、玩具同DVD等專利產品的銷售，未來營業額同盈利將可以倍數上升。
成功轉型燃氣股
雅域掃到1.29元，大升0.16元，係5年多以來嘅新高價，成交只得641萬股，街外貨源好疏。雅域急升，聽聞幕後人滿肚密圈，早幾日先宣布斟緊收購網上電腦遊戲業務，其他仲有好多大計劃，若然一一實現，相信股價有機會翻多番。
中油潔能成功轉型燃氣股後，已吸引到基金上車，德銀現持有7480萬股，每股作價0.424元，涉資3172萬元，持股量係7.44%，需要呈報；另外，IntegratedAsset已揸咗15.62%，相信未需呈報的基金，持股量亦有相當。
中油潔能噚日大升，收0.57元，升8仙，成交更大增到7700萬股，突破上升楔形阻力，照度上去，上升目標係0.85元。現水平入市，可以0.50元為止蝕位，作中線持有。
過去大半年，中油潔能已收購多家燃氣公司，分別在南京、北京、長春、無錫和山東等地經營業務，有消息指公司未來一兩個月會有大動作，相信基金亦會繼續上車同增持。
郭兆誠