唐唐今年出嘅預算案，掌聲唔多，反而好多人詐佢型，話佢孤寒，尤其唔滿意佢唔肯向弱勢社群放水，好似鄭大班（圖）咁，就係咁轟唐唐扶貧工作食蛋，就係因為咁，已經覺得唔可以支持，話到時實投反對票，即係唐唐至少無咗一票。
大班話反對，但民主黨就話未定，經濟事務話事人單仲偕話，邊有咁快知道呀，梗係要等政府回應咗，先決定投咩票啦，一副好均真，唔係隨便反對咁嘅款。
雖然有人同八方輸賭，話預算案未必過到關，但單雞就唔係咁睇，佢話自由黨啦、民建聯同泛聯盟等，都話咗會支持啦，政府都好穩陣吓，如果話過唔到，真係吹水唔抹嘴。
八方當然唔可以未卜先知，話預算案百分百過到骨，但反而好有興趣知道，究竟大班最後尾，係咪真係會向老友唐唐投反對票；唐唐又會唔會出招，令大班回心轉意呢？
爆料熱線：29290000、27860099
報料傳真：26239278
報料電郵：[email protected]