NEWS:藍田有人參豬賣

NEWS:藍田有人參豬賣

用人參、田七、雲芝等中藥飼養嘅豬肉你試過未?
藍田啟田街市啱啱推出「萬有放心肉」,呢種豬肉脂肪含量比內地豬低,每隻豬都檢驗過保證不含豬鏈球菌。小記噚日走落街市問過檔販,肉檔開張第1日已經賣咗近10隻豬,噚日亦賣咗7隻,加上𠵱家做緊推廣,買滿20蚊會減收5蚊,平均1斤豬肉比其他檔口平足足7-8蚊,唔怪得人頭湧湧啦!

街坊食過話……

董生:開張第1日買咗嚿豬排返屋企用蒜茸蒸,我覺得肉質比平時豬肉腍啲同甜啲,味道唔錯!

陳太:我無留意佢係咩「放」唔「放心」,不過覺得幾平就幫襯吓,啲豬肉都真係幾新鮮嘅!

李生:噚晚試過啲豬肉,幾爽幾鮮吖,但唔知係老婆心情靚整得好味咗定係豬肉真係靚咗喎!