有人話，吃鐵板燒最重要是食材新鮮，新鮮貨稍稍加兩粒鹽已經超好味；師傅卻說，吃鐵板燒最重是塊鐵板夠厚，厚鐵板才Keep到高溫，高溫才Keep到食物原味。或者是心理作用，我信師傅，因為啖過用厚鐵板煎出來的龍蝦肉，蘸少少自調鄧麗君醬，好味到我這個一向少試食的食版記者要面懵懵話：「師傅未試真啲味道喎，可唔可以嚟多客呀！」
記者：陳慧茵
攝影：陳偉強
模特兒：Carrie、Alice（Salvador）
舊鐵板燒出真味道
新舖卻用舊鐵板，吳師傅說：「4塊鐵板全部係10幾年前舊貨色，新鐵板鋼料嘅保溫功效無咁掂，舊鐵板比平常鐵板厚近1倍，唔會因為放生冷肉類或海鮮而降低板面溫度，Keep到喺攝氏180至200度，燒出嚟嘅食物就更香脆。」
「飯田」自調5款醬料，酸汁配蔬菜或魚類、葱油汁配肉類、芝麻醬是ShabuShabu常見醬料、香辣醬配牛肉，最有古講的是「鄧麗君醬」，話說鄧麗君生前經常幫襯吳志華以前工作的食肆，她自創用辣魚子、檸檬、沙律醬混成醬汁，最適合蘸龍蝦及海蝦。
各階層食客一網打盡
是日無聊上網，一Click方知銅鑼灣大小日本食店已飆升至接近150間，數近期最有Gimmick者則非「飯田日本料理」莫屬，此店與「富豪酒家」同一老闆翁仰光（人稱阿翁），樓高3層面積超大，一樓主打平價新派和食料理，二樓主攻鐵板燒，三樓共有8間貴賓廂房，擺明一網打盡各階層食客。師傅來頭也不小，行政總廚林金堂曾在「水車屋」任總廚24年，是獲得英皇集團致送足金老人金牌的資深員工；鐵板主管吳志華師傅則是首屆食神爭霸戰日本組冠軍得主，牌頭夠照，難怪I.T集團主席沈嘉偉早前亦偕同一家大細，預訂VIP房率先試食。
燒生龍蝦時價約$350
約12両頂級花龍龍蝦原隻起肉燒，鮮嫩爽口，吳師傅：「一定要Keep住7至8成熟，過熟蝦肉會變嚡。」
燒拖羅鮫（小）$180
日本九州拖羅鮫，即金槍魚魚腩以上近魚頭部份，足4人份量，肉質豐腴具嚼頭，集齊8至10人可試體積大3倍的巨型拖羅鮫。
吞拿魚眼鍋$180
驟看以為是魚頭，其實是足有拳頭大的吞拿魚魚眼！用鱲魚及雜菌熬湯底超甜，魚雲非常滑溜。
燒帶子$120
北海道帶子簡單用鹽及黑椒調味，表面香口而不乾身，入口外脆內軟，爽而味鮮。
燒黑毛牛$880
A5級數和牛，Order後先放室溫解凍35分鐘，再用攝氏180度以上高溫燒至5成熟，表面香脆內裏肉汁豐盈，牛味濃郁。
食客有Say
Kennix：「最欣賞海膽焗蝦，蝦好新鮮爽口。」
飯田日本料理（28930333）
地址：銅鑼灣駱克道447-449號中威商業大廈1-3樓
營業時間：12:00nn-3:00pm，6:00pm-12:00mn
座位：150個