華裔小姐冠軍出身的無綫姐仔廖碧兒，志願是成為一個百變藝人，早前為改戲路拍攝古裝劇飾演好打女俠，不惜變身大飯桶，每餐扒足兩大碗白飯。她稍後更會膽粗粗殺入樂壇，以35C驕人上圍拋胸催谷處女歌。
無綫去年推出由旗下男藝員主唱電視劇主題曲的唱片《男人魅》，今年再接再厲，將於本月推出由女藝員包括廖碧兒、胡杏兒和佘詩曼等演唱劇集主題曲的大碟《女兒紅》，主唱《人間蒸發》一劇主題曲《實情》的廖碧兒，被安排為該碟打頭炮宣傳，連日忙於催谷處女歌。
拜師學唱歌
日前廖碧兒在將軍澳接受訪問時，對於初試啼聲做歌手一事笑說：「唱歌唔係我強項，我𠵱家都跟老師學唱歌，好似吳卓羲同黃宗澤簽咗其他唱片公司，佢哋有好好嘅機會，我知道自己都有唱片公司傾，但交畀公司處理，自己唔會諗，勤力做好呢張碟先啦，一定要珍惜呢個機會。」
廖碧兒自幼習舞，加上天賦好身材，跳起舞來自然睇頭十足，她卻笑說：「其實你哋覺得性感係因為有跳舞，可能我嘅身材比較似外國人身材，有好多動作，啲人睇落去好似好犀利咁，其實出鏡嘅成套衫都係Nike，着喺入面件top都好高㗎。」
而拍劇方面，廖碧兒自言希望能做個百變藝人，故在剛拍竣的《強劍江湖》一劇中，初次嘗試扮俠女，實行挑戰自己的演技。
揮舞銅鐵劍
廖碧兒說：「我聽啲工作人員講，話鄭少秋喺屋企係練好重嘅劍，成幾十磅重，我哋拍《強劍》時，用嘅劍都係銅同鐵做，雖然好重，但拍出嚟係靚啲，自己做到嘅動作就盡量做，但唔食飯真係唔得，平日喼弗會食少啲澱粉質，拍呢套戲好多動作，要用好多熱能，我下晝都食兩大碗飯呀。」
採訪：朱倬誼 攝影：林德雄
協力：羅慧敏
服裝：BCBGMAXAZRIA
