春天嘅椰菜可以講話係最靚嘅，因為𠵱家收成嘅椰菜最有甜味。椰菜嘅品種好多，椰葉球有扁圓形、圓形、圓錐形，另外仲有葉片皺褶形同紫紅色品種等，不過市面賣開嘅一般以扁圓形青色為主。
實而重身為正菜
新鮮嘅椰菜，表面乾爽，菜葉肉質厚，手摸時堅硬而體重。唔新鮮或者開始腐壞嘅椰菜，表面有褐色或黑色嘅斑點或者條狀，近根部嘅切口發黑，如果莖部切口地方有腐爛嘅更加唔好買喇！至於外層有輕微褐斑嘅葉片，只要將佢剝掉，整個椰菜仍然係佳品。
紫紅色帶苦澀
西餐多用紫紅色品種，可以生吃，切幼絲伴碟，靚就靚喇，但就有啲苦澀，唔係人人都鍾意食。
所以我覺得綠色椰菜新鮮好食啲，最靚係白色中帶啲淺綠色，葉太青綠嘅就唔夠腍甜，但營養就比較好。椰菜含豐富嘅糖份、鉀同鈣，仲有多種維他命，對患上壞血病同結核病人有幫助㗎！