日股大漲409點，港股最叻之時都只係升63點，埋單進賬更只有17點，好友有啲條氣唔順。港股近期散完一輪後，人心未定，反覆多幾日，等啲信心不足嘅炒家離場，又再升過。
新地（016）上周五派成績表，本周一與周二下跌，跟住周三與周四回升。公司宣布業績後，有時有理冇理先掟一輪，然後升番。個市，並非淨係淡友嗰邊玩晒，有錢人家一樣可以玩番上去。
地鐵C輪9196：地鐵（066）周二派成績表，股價叫好唔叫座，周三跌0.35元，昨日定番，企喺16.80元。估計會好似新地咁，派成績表後隔一陣，重納升軌。地鐵上蓋畀發展商起樓，屬於「地盤供應商」，唔係「發展商」，坐喺度分錢，承受風險較小，較着數。瑞士信貸出報告，即刻將目標價提高8%至20.50元。
地鐵有運行，搵C輪埋手，最正係9196。10月下旬到期，輪價26仙，溢價1.3%，槓桿率6.5倍（有效5.3倍），引伸波幅23.7%。如果畀瑞士信貸估中，地鐵上到20.50元，隻輪值0.60元，和味咯！
太AC輪2270：睇成績表炒輪，望吓太A(019)，昨日盤數彈出，入於靚嗰類。唔怕交投靜，買C輪2270，7月中夠鐘，輪價54仙，溢價得1.5%，槓桿率13.9倍（有效9.7倍），引伸波幅19%。隻輪好爆炸，可以贏得肥肥白白，缺點係買賣唔易。
章盛