發展商宣傳樓盤，奇招盡出。內地發展商雅居樂（主力在中山起樓）就夠晒認真，為咗推銷兩個中山樓盤，專程請中文大學財務學系嘅劉民博士，做咗一個港人國內置業調查，話有三成受訪者以中山為內地置業首選地區，成為最受港人歡迎城市，仲勁過深圳。
中山係咪咁受歡迎呢?蘭西記得，今年初，置業國際發表港人內地置業調查時話，舊年港人選購內地住宅，深圳一直都係首選，佔咗總數嘅一半，其次係廣州，中山只係夾埋喺珠三角城市內，排第三。中原舊年發表嘅調查亦講到，○四年港人喺內地購買嘅物業，有五成喺深圳。
咁個個都係做調查，冇話邊個權威啲，蘭西亦唔敢話邊個可靠；只係呢一個置業調查由雅居樂贊助，唔知係咪因為咁，所以港人首選地區突然由深圳轉咗去中山？抑或咁啱，問親嘅受訪者都係特別鍾情中山呢個城市？