早前陳豪到橫店拍攝無綫新劇《滙通天下》外景，經歷了男人最痛，因個多月的拍攝佔一半時間也要騎馬取景，馬兒每跑一步，小豪便多痛一次。為此陳豪四處向人討教騎馬心得，避免小豪再受碰撞。
陳豪早前與郭羨妮、馬浚偉和楊怡等，到橫店為無綫新劇《滙通天下》拍攝外景，劇中也既要賽馬車，又要騎在馬上，幾乎接近一半時間也是跟馬匹做對手戲。
姜大偉教路
記者問騎術不算了得的陳豪，在拍攝期間遇上甚麼困難時，他竟十分坦白地說：「雖然以前有拍過騎馬戲，但今次係騎得最多嘅一次。成日騎喺馬上邊，某啲重要部位梗係會痛㗎啦，不過，我冇加啲乜嘢墊保護，至多係盡量豎高patpat，騎嘅時候夾實啲，避免硬碰囉。」
原來，一班男藝員私下也曾互相交換騎術心得，陳豪說：「馬仔（馬浚偉）之前拍過唔少騎馬戲，佢都有同我哋講吓佢騎馬嘅心得。不過，我哋最主要都係問姜大偉，因為佢拍騎馬戲真係拍好多，阿John（姜大偉）話條韁繩唔好扯得太緊，要放鬆啲，騎馬個型好緊要，所以腰要挺直，心口要挺直。」
請食薄荷糖
跟馬匹斷斷續續相處了一個月時間，陳豪不禁與他策騎的馬匹產生感情，他說：「我騎開嗰隻馬好鍾意食，我成日餵佢食嘢，佢特別鍾意食薄荷糖，但有次我畀漁夫之寶佢食，佢即刻吐出嚟不特止，竟然仲對住我嘴木木，好有性格。我走嘅時候都好唔捨得佢，但唔捨得都冇辦法。」
採訪：戴彩煥
