薄扶林貝沙灣一連錄得兩宗成交，業主雖然都係喺○四年入貨，不過就一賺一蝕，同人唔同命。賺嗰個係一期五座低層二手單位業主，入貨價一千零八十萬（呎價逾六千八），近千二萬（呎價約七千五）賣出，賺咗近一百萬。輸嗰個買入嘅係三期一座中層單位，係發展商一手樓花，千三萬（呎價逾七千六）買入，以一千三百一十八萬（呎價超過七千七）賣出，有十八萬進賬，但抵銷唔到約七十萬嘅釐印同雜費。
美聯區域經理梁文輝話，○四年初個市啱啱步入升軌，人人都以為全新嘅三期單位，升幅會比一期強勁，前仆後繼咁去搶三期嘅貨，個價搶高，益晒發展商電盈，相反，已經係現樓嘅一期單位，樓價平啲都冇乜人吼，搞到一期同三期呎價相差成千銀。
點知兩年後嘅今日，一期同三期嘅呎價只係相差兩、三百，睇好三期會大升嘅炒家跌晒眼鏡，早啲出貨重有些少執，𠵱家先賣就要蝕錢離場。唔願意隨波逐流，買一期嘅業主，反而有錢落袋。