唔怕生壞命最怕改壞名，睇六叔伉儷同爆棚哥陳國強檔新電視就知！出世到𠵱家，個名先係exTV，然後叫SUN，雖則啲大股東話滿意，但實情條路有幾難行真係盲都睇到，𠵱家行番個尾運，搵到小小超個now做傳送夥伴，但又突然改名做「無線收費電視」，冇錯，即係用番TVB個嘜頭！
CEO陳錫年強調改名同now冇關，主要係因為廣告客戶同消費者成日混淆新電視等如無線，令班同事Sell嘢嗰陣好困擾。佢話今次係八個月裏面第二度易名，盡量唔再變，咁他日有冇機會改叫now？大隻陳好肯定咁話「唔會」，最多都只會改為future，啊……原來係想超越「現在」!
外人又點睇個新名呢？對家K寶領導人吳天海話，要研究吓個新名有冇構成不公平競爭同埋違反防火牆條例，皆因以前新電視啲推銷員上門洗樓，經已成日借TVB個朵用，𠵱家更加名正言順，混淆視聽。聽落又好似幾有道理，咁呢個「罪名」一旦成立，唔知仲可以改咩名呢？
大隻陳又話，佢哋已經喺上星期五向廣管局申請改傳送形式，應該可以喺下個月中推出服務，咁咪即係焗廣管局今個月18號例會一定要批？
大隻佬冇正面回答，只係話總之有信心，仲話有咗now，可以加快達到上客30萬呢個目標……果然，舶到二少呢個好碼頭，真係講嘢都大聲咗，自信心都番晒嚟！
李華華
讀者如有任何意見或報料，歡迎發送電郵至[email protected]。