欖球一向是粗獷男兒及外籍人士的專利，場上拚命狂奔，還要不怕碰撞、拉扯及撲地，所以女孩子打欖球必會惹來奇異目光；但近年本地欖球運動不斷發展，成功吸引不少華籍女孩參與，大專院校更每年舉行女子賽。兩位大學欖球女將今次就親身分享「潮爆」欖球有幾好玩。文：曾雁平 攝影：黃賢創
從外表看，實在很難想像分別在香港教育學院及理工大學讀三年級的Nicole與Vivian是女子欖球員，兩人同樣是「細細粒」，好像大風點也會被吹倒；只是當她們換上欖球服裝示範技術及拍照時，看過她們的傳球和奔跑速度，原來是「有姿勢又有實際」，難怪兩人同是校隊的主力。過去幾年有愈來愈多人打欖球，當中很多就更加是本地華人，令比賽的競爭比以往更加激烈。
「比籃球更易掌握」
現為教院女子欖球隊隊長的Nicole說：「有朋友知我跑開短跑，就介紹我試打欖球，因為主要靠跑得快攞分，而我就這樣便開始跟操學打欖球。其實欖球並不難打，因為主要攞住個波跑同傳球，加上攔截，技術上可說比籃球更易掌握。」
打了欖球三年多的Vivian指出，好多人以為打欖球「咁多碰撞」會好易受傷，其實只要懂得怎樣保護自己，比賽及操練時盡量小心點，就可以減低受傷機會。自言打波認真又狠的Vivian說：「好多同學和朋友都懷疑我咁樣的身形打欖球得唔得，但當睇過我打波後，就知道我真係打得到，不是玩玩吓。」
玩咗欖球上身更結實
加入本港女子欖球隊Nomads的Nicole表示，打欖球過程中除可練到體能外，還可帶來好大滿足感：「我過往只玩短跑，所以耐力比較差，打咗欖球後耐力好咗，體形也較結實，當中上身同肩膀位就最明顯，基本上每星期保持住打波，已經唔需要花錢去邊度keepfit。」
至於Vivian認為，華人體形比較細，但只要夠快夠靈活就不會太輸蝕，她說：「打波幾年發覺，外籍球員有時幾驚對住我們這類細粒球員，因為我們一般會比佢哋快同靈巧，好似兔仔咁，佢哋好難截到我們這類球員。」
以靈巧補身形不足
兩人在本月底將與友人現場觀看每年一度「香港國際七人欖球賽」感受氣氛之餘，亦希望能從中偷師。
