炒家買嘢，主要係睇吓有冇水位，同埋係咪易甩手，住宅嘅通常會揀大屋苑，而屯門樓價比市區平好多，千零蚊一呎已有交易，所以係佢哋嘅入市對象，投機唔成就投資。
屯門大興花園近期有個投資者接炒家貨，一期四座低層A，五百四十四呎，炒家年初以七十五萬買入，成交期三個月，結果兩個月就成功搵到買家，以八十三萬五售出，賺八萬五離場；新買家係投資者，諗住買嚟長線收租。
同一屋苑，二期五座有個六百二十五呎中層B單位，今年一月中由投資者斥九十五萬購入，低市價半成，一個月成交期，上會後半個月即以一百零三萬八沽出，獲利八萬八，投資變投機，新買家又話係投資者，計劃用嚟收租。
中原地產分行經理陳志輝話舊年十一同十二月個市麻麻地，市場嘅成交，有三成業主肯畀三至四個月成交期買家，今年就縮短為兩至三個月，故仍有摸貨放盤，好似二期有六七個中高層單位，成交期五至六月，𠵱家放緊千八蚊呎。
陳志輝話大興花園近西鐵站，單位供應多，樓齡喺區內算新，所以吸引人炒，舊年總共有二百幾宗買賣，摸貨平均每個月有兩三宗。𠵱家市場總共有二百個盤放，投資者嘅貨佔三十個。
大興花園一期共四座提供九百六十伙，樓齡十七年，平均每呎一千五百五十五；有十二年樓齡嘅第二期，共十一座，有二千六百八十七伙，呎價千六。兩期單位月租都大約係七蚊呎，咁呢兩宗成交，買家回報應有五厘以上。炒家肯接行家貨，睇嚟大興花園個市仲有得玩。
電郵地址：[email protected]