周潤發昨日在北京八達嶺出席一個種樹宣傳活動，他指近日拍攝張藝謀導演的《滿城盡帶黃金甲》演皇帝，每日身邊有大批人侍奉，感覺十分享受，只是一登長城便有退休、在草原上策馬奔馳的打算。 北京直擊
在北京忙於演出張藝謀導演的古裝片《滿城盡帶黃金甲》的周潤發，昨日在百忙中抽出時間到萬里長城八達嶺為Timberland出席一個種樹的宣傳活動，該棵樹稍後會移師到內蒙種植，更會命名為周潤發，昨日他與太太除種樹外，還順便一遊長城風光，發哥說：「年幾前我已經嚟過長城影相，𠵱家重遊，一樣覺得好靚，空氣又好。」
渴望策馬拍照
站在長城上，發哥心情份外開朗，他說：「十年後我希望自己可以退休，然後騎住心愛嘅良駒到內蒙草原策馬奔馳，一邊影相，一邊欣賞風景，騎到攰就即場紮營，我諗呢種生活令人好寫意，𠵱家工作忙要過呢種生活就比較難，呢排喺北京拍戲，我都想抽時間學騎馬，但呢排日日要開工，都冇時間騎，今次我喺北京仲請咗全國騎術比賽冠軍哈達斯做我教練。」
「成班人服侍」
記者問他與張藝謀、鞏俐合作拍《滿》片感覺如何？發哥說：「好享受，張導演好肯聽意見，我哋好有交流，我好多謝佢畀個皇帝角色我做，因為日日開工有成班人圍住同服侍，我喺片場就好似皇帝咁，不知幾過癮！」記者又問他對周杰倫感覺？他就笑眼細細的周杰倫說：「喺入面佢做我個仔，如果我同鞏俐係兩公婆，我諗唔會生到呢個仔出嚟，因為我哋嘅眼同佢好唔同。」
採訪、攝影：丁寧
