麗新發展（488）一系近期脫胎換骨，經紀陳去年12月初推介麗展之時，股價只有0.137元，昨日隻股又升10.9％，收0.305元，只係短短3個月，麗展股價升咗1倍有多，去年12月上車揸到𠵱家，真係賺到笑。
麗新系旗下搞大陸地產的麗豐（1125）昨日傳出喜訊，據講係發新股畀1位新加坡地產大亨。聽聞雙方喺大陸早有合作，入股其實係遲早嘅事。
麗豐昨日朝早trade咗15分鐘就停牌，但股價已急升12.79％，按盤價0.485元，係近年高位，而成交股數高達1.28億股，金額5979萬銀，復牌後真係唔知會癲成點？
另外，中油潔能（260）獲德資銀行入股一事曝光，股價即刻抽高16.3％，收0.57元，成交亦急增至7708萬股，金額4111萬元。中油潔能剛在2月初公布收購山東的天然氣加油站，只係1個月就有外資垂青，實在叫人佩服。
經紀陳話，中油潔能炒上係遲早嘅事，隻股去年併完股再供股，貨源歸晒邊，炒高無難度。
慕容小初