立法會好多議員都戴兩頂帽，身兼人大政協，八方記得，民建聯主席馬力上年孖叉過班民主派，專揀啲開兩會嘅日子，提啲反動議案「突襲」，搞到佢哋都要趕返落香港保皇護駕。雖然噚日立法會冇敏感議案辯論，啲民主派個個偃旗息鼓，但啲人大政協都差唔多都返晒嚟開會，淨係得馬力留京。
始終馬力大病初癒，頻頻舟車勞頓對健康都唔好，唔開立會都情有可原。身兼政協嘅譚耀宗話，其他人會留到星期五開完內會後，再返北京開兩會。
不過，主席范太就前日返港，留一日即刻回京，唔知係咪太奔波，范太噚日喺議事堂叫咗幾次「陳苑淇議員」，搞到大家𢱑晒頭，立法會幾時加咗個新進歌手做議員，後嚟范太旁邊嘅人提佢應該係「陳婉嫻議員」，范太先如夢初醒，自己忍唔住笑起嚟，而嫻姐就哭笑不得，皆因唔知發生咗乜嘢事。
傳真︰2623-9278
電郵︰[email protected]