本地銀行界最高薪嘅CEO李國寶（圖）減咗人工，按該行年報顯示，05年度寶哥哥酬金總額2366.5萬元，較前年度2445.6萬元跌3.2%，就連兩個執行董事陳棋昌及彭玉榮嘅酬金總額，都分別減少6.4%及8.7%，去年各得809萬元。華華諗極都唔明，舊年東亞純利勁升17%，創出歷來第二新高，點解酬金不升反跌？
有高人指點話，原來該行高層嘅薪酬，一向都同集團股本回報率（ROE）嘅實質增長掛鈎，近年則加入更科學化算式，不但ROE要升，又要同無風險因素計算的利率比較。舊年任三招搞到息率回升，該行ROE雖然上升唔少，但對比息率後便抵銷咗一部份升幅，於是以獎勵花紅為主嘅五名高層，酬金就跌咗8%。