華華每日都睇好多研究報告，坦白講，好多都又長又「噚」兼冇咩分析，抄報紙都夠膽死，好少簡而清又到肉，不過噚日法資經紀CLSA講TOM仔嗰份就真係抵讚，雖則短短兩頁，但就好精準咁道出TOM仔嘅前景！
分析員哥哥AdrianLowe話，TOM仔𠵱家係「StubValue」，佢認為除咗分拆出嚟上市嘅TOM在線之外，其餘幾瓣業務都冇乜價值，不過，前任CEO王兟走咗，對TOM仔係一個好開始，無他，兟哥仔人工貴，收成2400萬一年，佔TOM仔收入17％㗎！
講番呢位雲南一級特產王兟，咪以為佢人氣不再，查實只係低調經營自己間跨「煤」體平台。兟哥經已喺威利（273）返工一段時間，由中環轉戰小廈門（即北角），新地盤唔就腳兼冇中環咁HighClass，但搵到水就得啦！況且佢喺TOM仔嗰個靚仔助手洪亮好似都過埋去同佢有影皆雙，咁就唔驚悶！
啲「煤」體又搞成點？財金界中人話，個幾月前兟哥經已做巡迴路演，有時仲一日幾場，由於佢老哥賣相討好兼個朵夠響，所以好多人爭住要貨。更重要係佢口才冇得頂，有幾勁？班大佬打咗個好抵死嘅比喻，話假如兟哥係媽媽生，就算成組都係「豬扒」，都可以畀佢Sell到全部唔使坐冷板櫈！
睇番威利股價又真係幾硬淨，自兟兄用兩毫六半入股到𠵱家，經已升到四毫幾，市跌佢都冇事。唔好睇小嗰一個幾毫，發咗都冇人知㗎！
李華華
讀者如有任何意見或報料，歡迎發送電郵至[email protected]。