中區甲級寫字樓價近年係咁升，買一個單位動輒都要一千幾百萬，面積大啲就隨時要億億聲，回報仲係低到得三四厘。但係如果識搵又唔要求高，兩三百萬就有交易，隨時有一分回報㖭。
金鐘力寶中心係當炒嘅甲級商廈，有個投資者用二百三十五萬，買入二座三十五樓十號室，面積三百九十二呎，呎價近六千。𠵱家力寶可以租到三十蚊一呎，細單位更挨近四十蚊，計落回報有八厘。
點解會咁筍嘅？原來呢個單位同一般唔同，係𨋢槽位，即係部𨋢去到頂，再對上嗰一層，當年買家全層買入，再間細賣時，將呢個位分契，當成為一個獨立單位賣。力寶總共得三個呢類單位，除咗成交在呢個外，其餘兩個在三十七樓同三十八樓，前者三百零四呎，放盤叫價每呎七千六；後者四百四十一呎，業主就話要萬一蚊呎至肯賣。
中環美國銀行中心都有三個𨋢槽寫字樓，其中二十五樓零八A室，三百呎，又係由買力寶嗰個買家用一百三十七萬買埋。呢個單位現在畀律師行用嚟存放文件，月租六千，租約明年到期，市值租金可以去到三十幾蚊一呎。
中原地產香港商業部高級營業經理李百堅話，呢類𨋢槽位單位冇窗，若果要裝冷氣系統，要使成百萬至得，或者安抽風機抽都得；至於單位優點係冇柱位。
咁乜嘢客會租用呢啲單位？李百堅話多數係律師樓用嚟放文件，好似力寶嗰件又係由律師樓自用。
電郵地址：[email protected]