呢排倒曾潮咁hit，民建聯一舉一動都好受注目，好似前日立法會開添馬艦小組咁，民記無人出聲，畀民主派玩晒，有人懷疑係咪民記費事畀人話倒曾，所以轉為支持添馬艦起政府總部計劃。不過，被指有份倒曾嘅曾鈺成堅稱，民記反添馬艦嘅立場「冇得傾」，佢從來唔倒曾，亦都唔會挺曾！
有記者問曾鈺成，係咪收到曾慶紅指示話要挺曾？點知曾鈺成發老脾話，呢個講法荒謬同黐線，IQ咁低先至講啲咁嘅古仔，有（指示）我都唔會聽！真夠膽。
民記噚日開黨團，黨團召集人劉江華話好奇怪，唔明點解一眾黨友唔發問，就向有份出席嘅黨友了解，李國英話，係因為無乜嘢好問，但劉江華堅持，民建聯支持東南九龍起政府總部，黨員點都應該問吓嘢。
咁又係，開咗聲就至少唔會俾人以為佢哋怕咗俾人話倒曾而轉軚支持添馬艦啦。
傳真︰2623-9278
電郵︰[email protected]