樂基兒近日被拍得在黎明家中與男友親熱纏綿，前晚她出席珠寶展大騷金鑽後，滿面風騷到中環蒲吧狂歡劈酒近五粒鐘。其間玩到剝剩背心仔、招牌反起，再遊街蒲七仔買糖，狂野成性的她更對偷拍未驚過，揚言狗仔隊跟她請早。
日前有周刊拍得黎明在樂景園豪宅中，與女友樂基兒又摸又攬又啜的親熱相片，但性情狂野的樂基兒絲毫未有放在心上，前晚出席珠寶騷後，雖然明知有大班記者追訪，但她一於少理，到中環Dragoni蒲吧隊酒狂歡。
肚腩縮水
前晚九時多，身穿黑褸和緊身牛仔褲的樂基兒從灣仔打的往中環，她落車時滿面笑容，心情大好，還自爆約了朋友在酒吧開飯。其間樂基兒在吧內玩到㷫，熱到脫下外褸，僅穿吊帶低胸小背心，但其肚腩仔就明顯比前縮水。
依舊風騷
隨後樂基兒與一女伴離開酒吧，往附近7-11便利店買零食，當樂基兒俯身揀糖時，現場見其背心的招牌也反了出來，相信她蒲吧必定玩得相當盡興，接着她購下一排萬樂珠糖，返酒吧時又邊行邊問記者：「你哋跟到幾時㗎？你哋可唔可以走先？我有排玩，我大概玩到兩點鐘度，你哋食飯先啦，我從來唔講大話，唔呃人嘅。」
樂基兒果然守時，約二時左右，便略帶酒氣離場，上的士直返羅便臣道香閨，臨上樓前還風騷問記者：「聽日你哋仲跟唔跟我㗎？要跟早啲囉喎。」
此外，樂基兒前晚蒲吧前曾到灣仔會展做珠寶騷，穿上白色tubedress示範多套鑽石頭冠、黃金頸鏈等，在台上風騷投入，不時展示甜笑、托腮等小動作。完騷後，問樂基兒對被拍到與黎明在家中親熱時，她只用手指示意封嘴避談。
採訪、攝影：娛樂突發組、顏英儀、陳慧安
