名模周汶錡一直被形容為富豪獵戶，近日盛傳她與外籍富商交往頻密，前日她就神神秘秘在名牌萬寶龍（MontBlanc）專門店挑選貴價男裝手錶和墨水筆，及後為自己揀鑽飾時卻捨不得開水喉。
三十一歲的名模周汶錡近年緋聞不絕，與舊愛杜德偉分手後，先後與台灣前國民黨主席連戰之子連勝文及內地富商傳緋聞，又傳她棄未入富豪族的陳姓追求者，據知近期她已結交一名外籍富商，雙方更時有約會。
晚晚有節目
近兩日周汶錡節目多多，晚晚去夜街，逛街購物更闊佬人哋孤寒自己。周汶錡前日偕女助手到中環ifc商場Isola餐廳歎下午茶，一口氣狂擦兩大件薄餅，補充體力後，便展開購物之旅。
周汶錡先到名牌MontBlanc專門店，她細看墨水筆，其後則於錶櫃前俯身揀男裝手錶，店員見狀即殷勤招呼，不停向她硬銷，她在店內約逗留三十分鐘後才離開，改往連卡佛百貨首飾部流連，試戴耳環兼頸鏈，足足試了大半個鐘，但齋試沒有幫襯，之後便坐的士返抵列堤頓道寓所，直至晚上八時多再外出，於中環一帶失去其芳蹤。
昨日周汶錡又偕女助手逛街，到皇后大道中ARTEMADRID首飾店睇鑽飾，但同樣沒有斬獲，逗留了十五分鐘後便離去，坐車返寓所，但下午三時又再坐的士往中環，顯然有節目。
力撐周麗淇
此外，日前周麗淇被踢爆拍拖，胞姊周汶錡昨日到尖沙嘴出席「壹慈善大拍賣」時說：「錯晒，我個妹已經否認咗，嗰個人唔知係邊個，普通人搭枱都話係，同普通朋友食嘢又話拍拖。阿妹同邊個拍拖，有冇拍拖我都知，佢𠵱家冇拍拖。」
未知周麗淇拍拖會否先讓她過目呢？周汶錡說：「唔使過目，拍拖好正常，女仔梗要拍拖。」
採訪、攝影：娛樂突發組
