容祖兒昨日在銅鑼灣宣傳手袋品牌，提到熱爆電影《斷背山》掀起的同性戀話題，祖兒亦曾惹同性戀疑雲，她直認有同性追求，亦覺得愛無分性別，又認為《斷》片導演李安指每個人心中都有一座斷背山，是指每人心中都有個小秘密。
容祖兒昨日以Coach之友身份，在銅鑼灣出席品牌專門店一周年誌慶活動，同場為「成長希望基金會」籌款，將新系列Scribble部份銷售收益捐贈作慈善用途。
做善事穿崩
昨日祖兒做該店的首位顧客，即場購買一千九百一十元的小手袋做善事，付款時，見祖兒非常就手地從大會贊助的風褸衣袋內，取出整數金額付款，巧合得出奇，明顯是大會事先安排。祖兒不禁以笑遮掩穿崩，儍更更地解畫：「又會咁啱嘅！」
祖兒表示有做善事，如扶婆婆過馬路，在內地助養兩個兒童。祖兒識做地大讚Coach對她非常好，毋須做代言人，只要平日影相宣傳，即有六位數字收入。
日前李安憑電影《斷背山》（BrokebackMountain）榮獲奧斯卡最佳導演的殊榮，該片掀起一股同性戀話題，祖兒先後傳與~H2O+老闆娘余麗絲、何韻詩過從甚密，惹同性戀疑雲，她即說：「傳啫，愛係冇分性別界限，斷背山都唔係只講同性戀，係講愛，親情都可以有愛㗎！」問她可介意發展同性關係？她說：「呢個乜嘢年代呀？我好多朋友都有呢個取向啦。」
直認有同性追求的祖兒又說：「我天姿國色，梗係乜嘢都有啦。」問她如何拒絕？她說：「過唔過電呢啲好直接囉，我係雙子座，係愛恨分明，對方會收到。」
人人有秘密
問祖兒心中可有一座斷背山？她不置可否說：「我諗佢（李安）講嘅斷背山，係話每個人心中都有個小秘密囉，每個人心中都有個小空間，我係藝人，條線同空間咪set得低啲同細啲囉。」
採訪：RitaLeung
攝影：DickyChan
